automobile
||Rajyadainik||

आजको समाचार

पहिरोले बस भिरबाट खस्दा एकको मृत्यु

अटोमोबाइल


नवलपरासी (बर्दघाट सुस्तापूर्व), असोज ९ । नवलपुरको दाउन्नेमा पहिरोले बस भिरबाट खसाल्दा एकको मृत्यु भएको छ भने छ जना घाइते भएका छन् । जिल्लाको विनयी त्रिवेणी गाउँपालिका–२ दाउन्नेस्थित विश्वकर्मा मन्दिर नजिक सडकमाथिबाट खसेको पहिरोको कारण बस भिरबाट खस्दा बसमा सवार रुकुमपश्चिम आठबीसकोट गाउँपालिका–१० बस्ने २५ वर्षीय हरिषचन्द्र केसीको मृत्यु भएको हो ।

बस भिरबाट खस्दा गम्भीर घाइते भएका केसीको गए राति उपचारका क्रममा पुरानो मेडिकल कलेज भरतपुरमा मृत्यु भएको जिल्ला प्रहरी कार्यालय नवलपुरका प्रहरी नायब उपरीक्षक मोहनबहादुर खाँणले बताए।

बिहीबार साँझ पूर्वबाट पश्चिमतर्फ गइरहेको ना५ख ७९४० नंको बस माथिबाट खसेको पहिरोका कारण सडकबाट करिब ३० फिट तल खसेको थियो । पहिरोेका कारण बस खस्दा अन्य छ जना घाइते भएका छन् । घाइते सबैको पुरानो मेडिकल कलेज भरपुरमा उपचार भइरहेको छ । बसमा १८ जना सवार थिए ।

यसैबीच दाउन्नेको यस खण्डमा बिहीबार बिहान ७ बजेबाट पहिरो खसी राजमार्ग बन्द भएकामा अझै पूर्णरूपमा सञ्चालन हुनसकेको छैन । गए राति पहिरो पन्छाएर सामान्यरूपमा यातायात सञ्चालन भएकामा पुनः सोही स्थानमा आज बिहान ३ बजेको समयमा पहिरो खसेपछि अहिले राजमार्ग एकतर्फीरूपमा सञ्चालनमा रहेको प्रहरी नायब उपरीक्षक खाँणले बताए । रासस

दशैंमा फोर्ड फिगो किन्नेलाई आकर्षक नगद छुट, २० प्रतिशत डाउन पेमेन्टमा पनि किन्न सकिने

अटोमोबाइल


काठमाडौं । फोर्डले दशैं तिहार लक्षित अफर सार्वजनिक गरिसकेको छ । कम्पनीले सार्वजनिक गरेको आफरमा ग्राहकले निकै राम्रो छुट प्राप्त गर्ने देखिएको छ । फोर्डको आधिकारीक वितरक जिओ फोर्डले बिक्री गर्दै आएको फोर्ड फिगो एउटा मात्रै भेरियन्टमा उपलब्ध रहेको छ । फिगोको टाइटानियम भेरियन्ट मात्र नेपालमा बिक्री हुँदै आएको छ । कम्पनीले यसको मूल्य पेट्रोल इन्जिनमा ३० लाख ९९ हजार रुपैयाँ रहेको छ भने डिजल इन्जिनमा ३४ लाख ९९ हजार रुपैयाँ रहेको छ । कम्पनीले ल्याएको अफर अनुसार ग्राहकले फिगोको खरिदमा ७५ हजार नगद छुट, एक वर्षको बीमा, एक वर्षको सडक दस्तुर, २५ हजार लोयल्टी बोनस प्राप्त गर्न सक्ने छन् । डाउन पेमेन्ट बापात ५० प्रतिशत रकम बुझाउने ग्राहकले ६ महिनाको इएमआई होलिडे प्राप्त गर्न सक्ने छन् । कम्पनीले दिने इएमआई होलिडे प्लानमा उक्त अवधिभर लाग्ने व्याज कम्पनीले तिरिदिने छ । ग्राहकले ६ महिनापछिबाट आफ्नो नियमित किस्ता तिर्न सुरु गर्नु पर्ने हुन्छ ।

यदि इआएमआई होलिडे ग्राहकले लिन नचाहेका ३ वटा स्क्र्याच कार्ड मार्फत कम्तीमा ७५ हजारदेखि ४ लाख ५० हजारसम्म नगद प्राप्त गर्न सक्ने छन् । कम्पनीले फिगो किन्न ५० प्रतिशत डाउन पेमेन्ट गर्न नसक्ने ग्राहकलाई २० प्रतिशत सुरुमा र बाँकी रकम ४ महिना भित्र तिर्नेगरि पनि गाडी उपलब्ध गराउने स्कीम दिएको छ । समग्रमा फिगो किन्न चाहने ग्राहकले कम्तीमा नगद १ लाख ५० हजार रुपैयाँ छुट प्राप्त गर्न सक्ने छन् । फिगोमा १.२ लिटर टिआई भिसिटी पेट्रोल इन्जिन दिइएको छ उक्त इन्जिनले ९६ पीएस पावर प्रदान गर्छ भने १.५ लिटर टिडीसिआई डिजल इन्जिनले १०० पीएस पावर प्रदान गर्छ । निकै आकर्षक डिजाइनमा तयार भएको फिगोमा ड्यूल टोन रुफ, स्पोर्टी सेलुलर ग्रिल, १५ इन्च अलोय ह्वील, रियरभ्यू क्यामेरा, ६ एयरव्याग, एबीएस, इबीडी, रेन सेन्सिङ वाइपर, ७ इन्चको इन्फोटेन्टमेन्ट सिस्टम, अटोमेटिक हेडल्याम्प, पुस बटम स्टार्ट/स्टप जस्ता फिचर उपलब्ध रहेको छ । कम्पनीले फिगोमा ३ वर्षको निःशुल्क सर्भिसिङ, ३ वर्षको वारेन्टी र एक्सचेन्जको सुविधा पनि उपलब्ध गराएको छ ।

२० लाख ९६ हजारमै हुन्डाई सेन्ट्रो

अटोमोबाइल


काठमाडौं । हुन्डाई सेन्ट्रोमा २ लाख नगद छुट दिने योजना कम्पनीले सार्वजनिक गरेको छ । कम्पनीले सेन्ट्रोको २०१९ मोडलमा १ लाख ८० हजार सिधै नगद र २० हजारदेखि १ लाखसम्म स्क्र्याच कार्ड मार्फत छुट दिने योजना ल्याएको हो । तर, २०२० मोडलमा भने १ लाख रुपैयाँ मात्रै छुट हुने छ । लक्ष्मी इन्टरकन्टिनेन्टल प्रालिले ल्याएको दशैं तिहार लक्षित योजनामा उक्त छुट दिने भएको हो । कम्पनीले अहिले सेन्ट्रोको पाँच भेरियन्ट बिक्री वितरण गर्दै आएको छ । जसमा इरा, मग्ना, मग्ना अटोमेटिक, स्पोर्टज् र आस्टा भेरियन्ट छन् । कम्पनीले ल्याएको योजनामा सेन्ट्रोको इन्ट्री लेवल भेरियन्ट किन्न चाहने ग्राहकले २० लाख ९६ हजार रुपैयाँमा नै खरिद गर्न सक्ने छन् । त्यस्तै सेन्ट्रोको अन्य कुनैपनि भेरियन्ट किन्न चाहने ग्राहकले क्रमश २ लाख रुपैयाँले छुट प्राप्त गर्न सक्ने छन् । सेन्ट्रो मग्नाको मूल्य २५ लाख ५६ हजार, मग्ना अटोमेटिकको २८ लाख ९६ हजार, स्पोर्टज्को २७ लाख ५६ हजार, आस्टाको ३० लाख ५६ हजार रुपैयाँ रहेको छ । तर, २०२० मोडल किन्न चाहने ग्राहकले भने इराको २३ लाख ९६ हजार, मग्नाको २६ लाख ५६ हजार, मग्ना अटोमेटिकको २९ लाख ९६ हजार, स्पोर्टज्को २८ लाख ५६ हजार र आस्टाको ३१ लाख ५६ हजार रुपैयाँ तिर्नु पर्ने हुन्छ । सेन्ट्रो २०२० मोडल बीएस ६ इन्जिनमा उपलब्ध हुने भएकाले यसको मूल्य १ लाख रुपैयाँले बढेको कम्पनीले जनाएको छ । साथै, कम्पनीले दिने नगद छुट पनि १ लाख रुपैयाँ मात्रै ग्राहकले पाउने छन् ।

नगद छुटको अलावा कम्पनीले स्वास्थ्य क्षेत्रमा काम गर्ने स्वास्थ्यकर्मीको लागि २५ हजार रुपैयाँ बराबरको सर्भिस भौचर उपलब्ध गराउने छ । उक्त भौचरको प्रयोग २ वर्ष भित्र गरिसक्नु पर्ने कम्पनीले जनाएको छ । एक वर्षको बीमा शुल्क, सडक दस्तुरजस्ता खर्च कम्पनीले व्योर्होने छ भने लक्की ड्र मार्फत बम्पर उपहारमा हुन्डाई ग्राण्ड आई १० नियोस एक थान र अउरा एक थान जित्न सक्ने छन् ।

यस्तो छ हुन्डाई सेन्ट्रो

टल ह्याचब्याक मोडलको रुपमा आएको सेन्ट्रोमा ठूलो स्पेश, शानदार लूक्स, फगल्याम्प्स, एड्जस्टेबल हेड रेस्ट जस्ता विशेषताले सेन्ट्रो नेपाली बजारमा निकै चर्चित बनेको छ । हुन्डाई सेन्ट्रोमा अल न्यू डिजाइन थेम प्रयोग गरिएको छ । यो कार ग्रान्ड आई-१० बाट प्रेरित छ भने, यसमा स्वेप्ट ब्याक हेडल्याम्प, नयाँ सिग्नेचर क्यासकेडीङ ग्रील दिएको छ । सेन्ट्रोमा पनि कम्पनीले आफ्नो पुरानो टल बोय थेमलाई नै निरन्तरता दिएको छ । यसको टप भेरियन्टमा १४ इन्चको अलोय ह्वील दिइएको छ भने, लो भेरियन्टमा १३ इन्च ह्वील दिइएको छ । यसको एक्सटेरियर डिजाइन निकै नै आकर्षक रहेको छ । यस्तै, नयाँ सेन्ट्रोमा सुरक्षाका लागि एबीएस, इबीडी, ड्राइभर-साइड एयरब्याग, इन्जिन इमोबिलाइजर, चाइल्ड सेफ्टी डोर लक जस्ता सेफ्टी फिचर दिइएको छ । सेन्ट्रोमा १.१ लिटर फोर सिलिन्डर पेट्रोल इन्जिन दिइएको छ । जसले ६९ पीएस पावर र ९९ एनएम टर्क जेनेरेट गर्छ । यसमा ५ स्पीड म्यानुअल र एएमटी गियरबक्स दिइएको छ ।

नेपाल आयो नयाँ एसयूभी ‘ग्लोरी ५६०’, यस्तो छ मूल्य

अटोमोबाइल


काठमाडौं । कुजु नेपालले इन्डोनेसियामा उत्पादन हुँदै आएको डिएसएफके ब्राण्डको ‘ग्लोरी ५६०’ एसयूभी बिक्री सुरु गरेको जनाएको छ । कम्पनीले आज एक विज्ञप्ती जारी गर्दै नयाँ एसयूभी बिक्री सुरु भएको जनाएको हो ।

कम्पनीले यसअघि डिएफएसके ग्लोरी ५८० बिक्री गर्दै आएको थियो । कम्पनीले आफ्नो व्यवसाय सुरुवात गरेको एक वर्षको अवशर पारेर नयाँ एसयूभी नेपाली बजारमा ल्याएको जनाएको छ । कोभिड १९ को कारण केही ढिला बिक्री सुरु भएको ग्लोरी ५६० नयाँ वर्षको अवशरमा नै बिक्री सुरु गर्ने लक्ष्य रहेको भएपनि नसकिएको कम्पनीको भनाई छ ।

‘नेपालमा उच्च प्रतिस्पर्धाको बाबजुदपनि हामीले डिएफएसकेका उत्पादनलाई ग्राहकसम्म पुर्याउन सकेका छौं । यसले भोलिका दिनमा अझ राम्रा राम्रा मोडल ल्याउँदै अगाडी बढ्ने हौसला प्रदान गरेको छ’, नयाँ एसयूभी सार्वजनिकपछि कुजु नेपालका संचालक उमिद श्रेष्ठले मेरोअटोसँग भने ।

उनका अनुसार गाडीको मूल्य, मूल्य अनुसारको फिचरको कारण डिएफएसके ब्राण्डले नेपालमा सफलता पाउँदै गएको छ ।

ग्लोरी ५६० मा यस्ता छन् फिचर

ग्लोरी ५६० को लम्बाई ४५१५ एमएम, चौडाई १८१५ एमएम र उचाई १७३५ एमएम रहेको छ । यसमा २६९० एमएमको ह्वीलबेस दिइएको छ । गाडीको कुल तौल भने २००५ केजी रहेको छ ।

ग्लोरी ५६० मा यूरो ५ मापदण्डको इन्जिन दिइएको छ । यसमा रहेको १.५ लिटर टर्बो पेट्रोल इन्जिनले अधिकतम ५७०० आरपीएममा १४८ बीएच पावर र १८०० देखि ४००० आरपीएममा २३० एनएम टर्क प्रदान गर्छ । यसमा ६ स्पीड म्यानुयल गियरबक्स दिइएको छ । साथै, ५० लिटरको इन्धन ट्याङ्क उपलब्ध रहेको छ ।

ग्लोरी ५६०, ग्लोबल एनक्यापबाट क्र्यास टेष्टमा ५ स्टार रेटिङ प्राप्त गरेको एसयूभी हो । यसको चारै चक्कामा डिस्क ब्रेक दिइएको छ । १७ इन्चको अलोय ह्वील, एयरव्याग, सिट बेल्ट रिमाइन्डर, एबीएस, इबीडी, इन्जिन इमोविलाइजर, आलर्म सिस्टम, स्पीड सेन्सिङ अटो लक, क्र्यास अटो अनलक जस्ता फिचर यसमा पाउन सकिन्छ ।

ग्लोरी ५६० मा सफ्ट टच ड्यास बोर्ड दिइएको छ भने, ड्यासबोर्डमा ८ इन्चको फ्लोटिङ इन्फोटेन्टमेन्ट डिस्प्ले दिइएको छ । रिभाइज क्यामेरा, पुस स्टार्ट/स्टप बटम, किलेस इन्ट्रि जस्ता विशेषता यसमा पाउन सकिने छ ।

कम्पनीले यसमा ३ वर्ष वा ४० हजार किलोमिटर जुन पहिला आउँछ त्यही बराबरको वारेन्टी प्रदान गर्ने छ । कम्पनीले ग्लोरी ५६० को मूल्य ५७ लाख ५० हजार रुपैयाँ तोकेर बिक्री सुरु गरेको जनाएको छ ।

पल्सर १५० टिडीलाई टक्कर दिन आरटीआर १६० फोर भी सिंगल डिस्क, मूल्य दुई हजार फरक

अटोमोबाइल


काठमाडौं । नेपाली बजारमा प्रबेश गरेदेखि नै पल्सर सफल मोडलको रुपमा स्थापित हुँदै आएको मोडल हो । अहिले बजारमा यामाहा, टीभीएस, होन्डा, सुजुकी, हिरो लगायतका ब्राण्डले पल्सर १५० को बिक्रीलाई भेट्ने प्रयास गरेको भएपनि अन्य कम्पनीको तुलनामा पल्सर सिरिजको माग र लोकप्रियता निकै माथि रहँदै आएको छ ।

विभिन्न समयमा पल्सर सिरिजलाई टक्कर दिन अन्य कम्पनीले नयाँ नयाँ मोडल ल्याएको भएपनि यसको प्रतिस्पर्धामा अन्य कम्पनीले ल्याएका मोडल खरो उत्रन सकेका छैनन् ।

पल्सर सिरिजमा १५० सीसी क्षमताको मोटरसाइकलको बेग्लै पहिचान बनेको छ । यसलाई कम्पनीले रेगुलर मोडल क्लासिक र टिडी (दुबै चक्कामा डिस्क ब्रेक) भएको भेरियन्टमा बिक्री गर्दै आएको छ ।

केही दिनअघि टीभीएसले आफ्नो चर्चित मोटरसाइकल आरटीआर १६० फोर भि सिंगल डिस्क भेरियन्टको बिक्री सुरु गरेको थियो । जगदम्बा मोटर्सले यसको मूल्य पल्सर १५० टिडीको तुलनामा २ हजार रुपैयाँ बढी राखेर बिक्री सुरु गरेको हो ।

डबल डिस्क भेरियन्टको मूल्य २ लाख ८९ हजार ९०० रुपैयाँ रहेको आरटीआरको सिंगल डिस्क भेरियन्टको मूल्य २ लाख ७२ हजार ९०० रुपैयाँ राखेको छ । जुन करिब १७ हजार रुपैयाँ सस्तो हो । कम्पनीले राखेको मूल्यले पल्सर १५० टिडीसँग सिधा प्रतिस्पर्धा गर्ने लक्ष्य भएको प्रस्टै देखिन्छ ।

पछिल्ला दिनमा पल्सर १५० टिडीको बिक्री ठूलो संख्यामा भइरहेको छ । यसमै आफुलाई स्थापित गर्न टीभीएसले आरटीआर फोर भिको सिंगल डिस्क भेरियन्ट बजारमा उतारेको हो ।

यी दुई मोटरसाइकलमा डिजाइन, पावर लगायत विषयमा भिन्नता पाउन सकिन्छ । यस्तोमा बजाजको सर्वाधिक चर्चित मोटरसाइकललाई टीभीएसको सफल मोटरसाइकलले दिने टक्कर हेर्न लायक हुने अनुमान गर्न सकिन्छ ।

बजाज पल्सर १५० टीडी र अपाचे आरटीआर १६० फोर भी सिगंल डिस्क बीच रहेको तुलनात्मक भिन्नता यसप्रकार छन् ।

इन्जिन

बजाज पल्सर १५० टीडीमा १४९.५ सीसी सिगंल सिलिन्डर एयर कुल्ड इन्जिन रहेको छ । यो इन्जिनले ८००० आरपीएममा १३.८ बीएच पावर तथा ६००० आरपीएममा १३.४ एनएम टर्क जेनेरेट गर्छ । यसमा ५ स्पीडको गियरबक्स जडान गरिएको छ ।

आरटीआर १६० सिगंल डिस्कमा १५९.७ सीसी सिगंल सिलिन्डर लिक्वीड कुल्ड इन्जिन रहेको छ । यो इन्जिनले ८२५० आरपीएममा १६.२ बीएच पावर तथा ६००० आरपीएममा १४.८ एनएम टर्क जेनेरेट गर्छ । यसमा ५ स्पीडको गियरबक्स जडान गरिएको छ ।

माइलेज

बजाज पल्सर १५० मा १५ लिटरको इन्धन स्टोरेज क्षमता रहेको छ भने आरटीआर १६० मा १२ लिटरको इन्धन क्षमता रहेको छ । बजाज पल्सर १५० ले प्रतिलिटर ६५ किलोमिटर र टीभीएसले ५० किलोमिटर प्रतिलिटर माइलेज दिने एआरएआईले प्रमाणित गरेको छ । तर, यी दुबै मोटरसाइकलको अनरोड माइलेज भने दाबी भन्दा कम आउने छ ।

ब्रेक/ह्वील

बजाज पल्सर १५० टिडीको दुबै चक्कामा डिस्क ब्रेक रहेको छ । यस्तै आरटीआर १६० मा सिगंल डिस्क रहेको छ । बजाज पल्सर १५० को फ्रन्टमा २६० एमएम र रियरमा २३० एमएमको डिस्क ब्रेक रहेको छ । यस्तै आरटीआर १६० को फ्रन्टमा २७० एमएमको डिस्क र रियरमा १३० एमएमको ड्रम ब्रेक रहेको छ । दुबै मोटरसाइकलमा समान १७ इन्चको ट्यूवलेस टायर र अलोय ह्वील दिइएको छ ।

सस्पेन्सन

बजाज पल्सर १५० को अगाडि एन्टी फ्रिक्सन टेलिस्कोपिक सस्पेन्सन र पछाडि ५ स्टेप एड्जष्टएबल निट्रोक्स सक एब्जर्बर रहेको छ । आरटीआर १६० को अगाडि टेलिस्कोपिक सस्पेन्सन र पछाडि मोनोशक सस्पेन्सन रहेको छ ।

अन्त्यमा, बजाज पल्सर माइलेज तथा संचालन खर्च कम हुने मोटरसाइकल हो । त्यस्तै आरटीआर १६० फोर भी स्टाइलिस डिजाइन र पावरफुल इन्जिनको कारण सफल बन्दै गएको मोटरसाइकल हो । मूल्य समान रहेको यी दुई मोटरसाइकल बीच कडा प्रतिस्पर्धा हुने देखिन्छ ।

लामो तथा मध्यम दूरीका सार्वजनिक सवारी चलाउन व्यवसायी अनिच्छुक

अटोमोबाइल


काठमाडौँ — भाद्र १९, २०७७। 

आगामी असोज १ देखि लामो तथा मध्यम दूरीका सार्वजनिक सवारीसाधन सञ्चालन गर्ने भनिए पनि व्यवसायी भने आश्वस्त हुन सकेका छैनन् । स्पष्ट निर्णय नभएको भन्दै व्यवसायीले सञ्चालनमा अनिच्छा देखाएका हुन् ।

कोभिड–१९ सङ्क्रमित दैनिक बढ्दै गएकाले यसै भन्न नसकिने अवस्था नरहेको नेपाल यातायात व्यवसायी राष्ट्रिय महासङ्घले जनाएको छ । यातायात व्यवस्था विभागले पनि कोरोना प्रभावको हालको अवस्था हेर्दा सञ्चालन हुनसक्छ नै भन्न नसकिने जनाएको छ ।

विभागमा महानिर्देशक गोगनबहादुर हमालले भन्नुभयो, “अहिले विभाग पनि पूर्ण आइसोलेसनमा छ । असोज १ बाट खुला गर्ने त भनिएको छ । कोरोनाको प्रभाव बढ्दै गयो भने त के खुल्ला र ? ” र यातायात व्यवसायीले भने सरकार गम्भीर नभएको आरोप लगाएका छन् । महासङ्घका वरिष्ठ उपाध्यक्ष विजय स्वाँर भन्नुहुन्छ, “पहिला पनि सञ्चालन गर्ने भनेर दुईपटक सम्म सरकारले भनेको हामीले गाडी मर्मत गरेर तयारी गरेकै हो तर सञ्चालन भएन । अहिले पनि सञ्चालन हुन्छ भन्ने के ग्यारेन्टी रु यसरी पटकपटक गाडी मर्मत गर्दै थन्काउँदै गर्नसक्ने अवस्थामा हामी छैनौँ । ”
करिब छ महिना बन्द भएका लामो तथा मध्यम दूरीका सार्वजनिक सवारी साधनलाई सरकारले अहिलेसम्म कुनै राहत नदिएको व्यवासायीले गुनासो गरेका छन् । सार्वजनिक यातायातलाई पहिला अति प्रभावित क्षेत्रमा राखिएको तर पछि मध्यम प्रभावितमा राखेर राहत तथा सुविधाबाट वञ्चित गर्न खोजिएको व्यवसायीको भनाइ छ । स्वाँरका अनुसार सरकारले मध्यम प्रभावित भनिदिएपछि बैङ्कले कर्जा तथा ऋणको किस्तामा कुनै सुविधा दिँदैनन् ।

स्वाँर भन्नुहुन्छ, “अहिलेसम्म कुनै निकायबाट हुनै राहत पाएका छैनौँ । बैङ्कले कर्जाको पुनर्तालिका गर्नसमेत मानेका छैनन् । सरकारले गरेको घोषणा, सहमति र मौद्रिक नीतिले व्यवस्था गरेका कुरा पनि अहिलेसम्म कार्यान्वयन भएको छैन । ”

गाडी सञ्चालन भएको अवस्थामा अपनाउनुपर्ने सुरक्षा मापदण्डबारेमा व्यवसायीले कुनै तयारी थालेका छैनन् । मास्क तथा सेनिटाइजर प्रयोगको कुरा सामान्य भयो तर यात्रुको व्यवस्थापन कसरी गर्ने सबै सिटमा यात्रु राख्न पाइने÷नपाइने, बीचबाट यात्रु चढाउन पाइने÷नपाइने कुनै कुराको टुङ्गो नभएको महासङ्घले जनाएको छ ।
सामाजिक दूरी कायम गर्न तत्कालका लागि सरकारले ५० प्रतिशत भाडा वृद्धि गरिएको थियो । यातायात मजदुरको एक लाख रुपियाँको कोरोना बीमामा सरकारले ५० र यातायात व्यवसायीले ५० प्रतिशत अनुदान गर्ने सहमति छ ।

यातायात श्रमिकको कोरोनाका कारण मृत्यु भएमा आश्रित परिवारलाई क्षतिपूर्ति उपलब्ध गराउनका निम्ति सरकारका तर्फबाट कोष स्थापनाका लागि विभागले भौतिक पूर्वाधार तथा यातायात मन्त्रालयमा पहल गर्ने सहमति भएको थियो । यातायात मजदुरलाई स्वास्थ्य उपकरणको व्यवस्था व्यवसायीले र यात्रुको व्यवस्था स्वयंले गर्नुपर्ने सहमति विभागसँग भएको थियो । सहमति कार्यान्वयन नभएको उपाध्यक्ष स्वाँरले बताउनुभयो ।

पाँच महिना लामो बन्दाबन्दीमा ७० अर्ब रुपियाँ बराबरको नोक्सान भएको व्यवसायी बताउँछन् । यो समाचार आजको गोरखापत्रले प्रकाशन गरेको छ ।

पहिलेभन्दा ३ लाख सस्तोमा नयाँ स्कोडा र्‍यापीड, यस्तो छ सबै भेरियन्टको मूल्य

अटोमोबाइल


काठमाडौं । स्कोडा र्‍यापीडको नयाँ मोडल नेपाली बजारमा आगामी हप्ताबाट बिक्री सुरु हुने भएको छ । नेपालको लागि स्कोडाको आधिकारीक बिक्रेता एमएडब्ल्यू इन्टरप्राइजेजले नयाँ टिएसआई इन्जिनसहितको स्कोडा र्‍यापीडको बिक्री सुरु गर्ने भएको हो ।

कम्पनीले नयाँ र्‍यापीडको मूल्य समेत प्रकाशन गरिसकेको छ । साउन ८ गते कम्पनीले नयाँ मोडलको मूल्य प्रकाशन गरेको हो । कम्पनीले प्रकाशन गरेको नयाँ मूल्य अनुसार यसको सुरुवाति भेरियन्ट र्‍यापीड एक्टीभ राइडरको मूल्य ३४ लाख ९० हजार रुपैयाँ हुने छ । यसअघि बिक्री हुँदै आएको रेगुलर मोडल र्‍यापीडको सुरुवाति मूल्य ३८ लाख ४५ हजार रुपैयाँ थियो भने टप भेरियन्टको मूल्य ५७ लाख ९५ हजार रुपैयाँ थियो ।

विभिन्न ५ भेरियन्टमा नेपाल आउन लागेको र्‍यापीड टिएसआईको अन्य भेरियन्टमा राइडर प्लसको मूल्य ३६ लाख ९० हजार, एम्बीएन्टको मूल्य ४३ लाख ९० हजार, स्टाइल भेरियन्टको मूल्य ५० लाख ९० हजार, ओनेक्स भेरियन्टको ४४ लाख ९० हजार र मोन्टेकार्लो भेरियन्टको मूल्य ५१ लाख ९० हजार रुपैयाँ तोकिएको छ ।

किन भयो सस्तो ?

स्कोडाले भारतीय बजारलाई केन्द्रमा राखेर ल्याएको टिएसआई इन्जिन १.० लिटर टर्बो इन्जिन हो । यसअघि र्‍यापीडमा १.६ लिटर क्षमताको इन्जिन रहेको थियो । इन्जिन क्षमता कम हुँदा यसको राजस्वमा १० प्रतिशतको फाइदा हुने भएकाले कम्पनीले यसको मूल्यपनि १० प्रतिशतले नै घटाएर निर्धारण गरेको हो ।

यस्तो छ नयाँ र्‍यापीड टिएसआई

भारतीय प्रदुषण मापदण्ड बीएस ६ अनुसारको इन्जिनमा र्‍यापीड आउने छ । यसमा रहेको १.० लिटर टिएसआई इन्जिनले १०८ बीएच पावर र १७५ एनएम टर्क प्रदान गर्ने छ । यसमा ६ स्पीड म्यानुयल गियरबक्स दिइएको छ । नयाँ र्‍यापीड पेट्रोल इन्जिनमा मात्रै उपलब्ध हुने छ ।

नयाँ इन्जिनले १८.९७ किलोमिटर माइलेज दिने एआरएआईले प्रमाणित गरेको छ । कारमा ४६० लिटरको बुट स्पेश उपलब्ध रहने छ । कारमा आधुनिक टचस्कृन इन्फोटेन्टमेन्ट सिस्टम उपलब्ध रहेको छ ।

अटोमेटिक क्लाइमेट कन्ट्रोल, एयरव्याग, एबीएस, इबीडी, चाइल्ड सेफ्टी लक, फ्रन्ट र साइड इम्प्याक्ट बीम, एड्जस्टेवल सिट, इन्जिन इमोविलाइजर, क्र्यास सेन्सर, ड्यूल टोन ड्यासबोर्ड जस्ता फिचर उपलब्ध रहेका छन् ।

सरकारी नीतिविपरीत विद्युतीय गाडीमा कर

अटोमोबाइल


काठमाडौं, जेठ १७ । विद्युतीय सवारीसाधनलाई प्रवद्र्धन गर्ने सरकारी नीतिविपरीत अर्थमन्त्री युवराज खतिवडाले आगामी आर्थिक वर्षको बजेटमा यस्ता सवारीसाधन आयातमा उच्च दरले कर बढाएका छन्। बजेटसँगै आएको आर्थिक विधेयकमा विद्युतीय सवारीसाधनको खरिदमा गाडीको क्षमता हेरेर ३० देखि ८० प्रतिशतसम्म भन्सार शुल्क र ४० प्रतिशतसम्म अन्तःशुल्क कर लगाउने व्यवस्था गरिएको छ।

विधेयकमा पिकपावर तीनसय किलोवाटभन्दा बढीका कार, जिप, भ्यानमा ८० प्रतिशत भन्सार शुल्क र ६० प्रतिशत अन्तःशुल्क लाग्ने व्यवस्था छ।यसअघि विद्युतीय निजी सवारीसाधन खरिदमा १० प्रतिशत भन्सार शुल्क र १३ प्रतिशत भ्याट शुल्क लाग्ने गथ्र्यो। अब भने विद्युतीय सवारीसाधनको मूल्य झन्डै दोब्बर पर्ने भएको आजको नागरिक दैनिकमा खवर छ ।

सवारीसाधन आयात सम्बन्धी व्यवस्था परिमार्जन, चलखल बढ्ने खतरा

अटोमोबाइल


काठमाडौं । सरकारले हिजो सार्वजनिक गरेको आर्थिक वर्ष २०७७/७८ को बजेटमा सवारीसाधन पैठारी सम्बन्धी विषेश व्यवस्थामा केही परिमार्जन गरेको छ । यसले आगामी दिनमा चलखेल बढ्ने खतरा बढेको छ ।

कस्ता कम्पनीले सवारीसाधन आयात गर्न पाउने भन्ने विषयमा ५ खण्डमा व्याख्या गरिएको छ । यस्ता सर्तको खण्ड (क) मा निर्माता कम्पनी वा निजको आधिकारिक बिक्रेताबाट खरिद गरिएका नयाँ सवारी वा ढुवानीका साधन नेपाल स्थित आधिकारिक बिक्रेताले मात्र पैठारी गर्न पाउने छ भन्ने उल्लेख गरिएको छ । जुन व्यवस्था यसअघि पनि गरिएको थियो ।

तर, सरकारले यस वर्षको बजेटमा सवारीसाधन आयात सम्बन्धी व्यवस्थामा परिमार्जनगरि खण्ड (ङ) मा नयाँ व्यवस्था गरेको छ । खण्ड (क) मा उल्लिखत शर्त उलङ्घन गरी सवारी वा ढुवानीका साधन पैठारी गरेमा त्यस्ता सवारी साधन तथा ढुवानी साधनको मूल्यको तिस प्रतिशत जिरवाना गरी जाँचपास गर्न सकिने छ । भन्ने नयाँ व्यवस्था गरेको छ ।

यसले यसअघि नेपाली भन्सारमा रोकिएका सवारीसाधन नेपाल प्रबेशको बाटो खोलेको छ भने भविष्यमा यही प्रकृयाबाट गाडी आयात गर्न थप प्रोहोत्सान दिएको छ ।

यसअघि व्यवस्था भएको कुनै डिलर कम्पनीबाट आयात भएको भए उत्पादक, डिलर र आयातकर्ता बीच भएको ‘ट्राइपाटी एग्रिमेन्ट’ अनिवार्यरुपमा देखाउनु पर्ने व्यवस्थालाई यसपटकको बजेटले हटाइ दिएको छ । यसले कुनैपनि स्थानबाट खरिद गरेर ल्याइने नयाँ सवारीसाधन सहजै नेपाल आउने बाटो खोलेको हो ।

‘यसरी सबै गाडी सहजै ल्याउने वातावरण निर्माण हुँदा कम मूल्यमा गाडी ल्याउने र ३० प्रतिशत जरिवाना तिरेर भन्सार पास गर्ने परिपाटी मौलाउने संभावना बढेको छ’ एक व्यवसायीले भने ।

यसअघि कानुनी रुपमा कडाई गर्दासमेत आधिकारीक बिक्रेता नभइ गाडी ल्याउनेहरु बढेको समयमा बजेटले यस्तो व्यवस्था गरेकाले थप चलखेल हुने खतरा बढेको हो ।

एउटै इलेक्ट्रीक कारमा २ करोड मूल्य बढ्ने, मोटर क्षमता अनुसार फरक अन्तःशुल्क

अटोमोबाइल


काठमाडौं । सरकारले इलेक्ट्रीक सवारीसाधनमा व्यापक करको दरमा परिमार्जन गरेको छ । हिजो सार्वजनिक भएको बजेटले इलेक्ट्रीक कारको भन्सार ८० प्रतिशत कायम गर्दै त्यसमा ५० प्रतिशत छुट दिएको छ भने अन्तःशुल्क मोटर क्षमताको आधारमा लगाउने निर्णय गरेको छ ।

सरकारले यसअघि इलेक्ट्रीक कारमा १० प्रतिशत भन्सार, १३ प्रतिशत भ्याट र ४ प्रतिशत मात्रै सडक दस्तुर लिदै आएको थियो ।

कुन मोटरमा कति अन्तःशुल्क

५० किलोवाटसम्मका मोटर जडान भएका कारमा ३० प्रतिशत अन्तःशुल्क लगाइएको छ । त्यस्तै ५० देखि १०० किलोवाटसम्मका मोटर भएका ४० प्रतिशत अन्तःशुल्क र १०० सयदेखि १५० किलोवाटसम्मका कारमा ५० प्रतिशत अन्तःशुल्क लगाइएको छ ।

त्यसैगरि १५० देखि २०० किलोवाट क्षमता मोटर जडित कारमा ६० प्रतिशत, २०० सयदेखि ३०० किलोवाट सयसम्मका कारमा ७० प्रतिशत र त्यसभन्दा माथिका कारमा ८० प्रतिशत अन्तःशुल्क लाग्ने व्यवस्था बजेटले गरेको छ ।

उदाहरणमा हेरौं कति बढ्ला मूल्य

केही महिना अघि नेपालमा ल्याएर १ करोड ५० लाखसम्ममा बिक्री गरेको यो कार ७४ हजार पाउण्ड खरिद मूल्यमा आएको थियो । आजको एक्सचेञ्ज रेट अनुसार यसको खरिद मूल्य १ करोड ९ लाख ५२ हजार हुन्छ ।

सरकारले हिजो ल्याएको बजेट अनुसार यो गाडीमा ८० प्रतिशत भन्सार शुल्क लाग्छ । इलेक्ट्रीक सवारीसाधन भन्दै यसमा ५० प्रतिशत भन्सार छुटको व्यवस्था गरेको छ । यसले ४० प्रतिशत मात्रै भन्सार तिरे पुग्छ । भन्सार शुल्क वापत ४३ लाख ८० हजार ८०० रुपैयाँ पुग्छ ।

उक्त भन्सार शुल्क सहितको रकम १ करोड ५३ लाख ३२ हजार ८०० रुपैयाँमा ६० प्रतिशत अन्तःशुल्क लाग्ने छ । यसमा ९१ लाख ९९ हजार ६८० रुपैयाँ अन्तःशुल्क लाग्ने छ । अउडी इट्रोनमा १६५ किलोवाटको मोटर प्रयोग गरिएकाले यसमा अन्तःशुल्क ६० प्रतिशत लागेको हो ।

गाडीको खरिद मूल्यमा भन्सार र अन्तःशुल्क जोड्दा २ करोड ४५ लाख ३२ हजार ४८० रुपैयाँ हुन्छ । उक्त रकममा भ्याट वापतको १३ प्रतिशत ३१ लाख ८९ हजार २२२ रुपैयाँ जोड्दा २ करोड ७७ लाख २१ हजार ७०२ रुपैयाँ हुन आउँछ ।

अझै, यसमा सडक दस्तुरको रुपमा ५ प्रतिशत लाग्ने व्यवस्था गरिएको छ । यो व्यवस्था अनुसार १३ लाख ८६ हजार ८५ रुपैयाँ तिर्नु पर्ने हुन्छ । यी सबै रकम जोड्दा २ करोड ९१ लाख ७ हजार ७८७ रुपैयाँ हुन्छ ।

यसमा व्यवसायीले २० प्रतिशत कुल नाफा राखेर बिक्री गरेको खण्डमा पनि यो गाडीको मूल्य ३ करोड ४९ लाख २९ हजार ३४४ रुपैयाँ पर्न आउँछ ।

यसले एउटा अउडीको मूल्य झण्डै २ करोड रुपैयाँले वृद्धि हुने छ ।