सहभागी बिरामी भएपछि अक्सफोर्डको कोरोना खोप परीक्षण स्थगित



लन्डन — भाद्र २४, २०७७। 

अक्सफोर्ड विश्वविद्यालय र एस्ट्राजेनेकाले विकास गरेको कोरोना भाइरसविरुद्धको खोप परीक्षण हाललाई स्थगित गरिएको छ । कोरोना भाइरसविरुद्धको खोप अन्तिम परीक्षणका क्रममा रहेको बताइएको थियो ।

एस्ट्राजेनेकाका अनुसार परीक्षणमा सहभागी एक व्यक्ति बिरामी भएकाले तत्कालका लागि खोप परीक्षण स्थगित गरिएको हो । ती व्यक्ति कसरी बिरामी भए भन्ने अनुसन्धान भइरहेको र त्यो पत्ता लागेपछि मात्रै खोपको परीक्षणलाई पुन: सञ्चालन गरिने एस्ट्राजेनेकाले बताएको छ ।

बीबीसीका अनुसार अब यसको स्वतन्त्र जाँच हुनेछ । सुरक्षा मापदण्डका बारेमा समीक्षापछि मात्रै खोपको पुन: परीक्षण हुने नहुने टुंगो लाग्ने बीबीसीका मेडिकल सम्पादक फर्गस वाल्सले बताएका छन् ।

अक्सफोर्ड र एस्ट्रेजेनेकाले विकास गरेको खोपमा विश्वकै ध्यान केन्द्रित थियो । विश्वका विभिन्न देशमा करिब एक दर्जन जति खोप परीक्षणमा रहे पनि अक्सफोर्डले बनाइरहेको खोप सबैभन्दा अगाडि रहेको बताइएको थियो । पहिलो र दोस्रो चरणको परीक्षण सफल भएपछि छिट्टै नै अक्सफोर्ड र एस्ट्राजेनेकाले बनाएको खोप आम प्रयोगमा आउन सक्ने अनुमान गरिएको थियो । बीबीसीका अनुसार तेस्रो चरणको परीक्षणमा अमेरिका, बेलायत, ब्राजिल र दक्षिण अफ्रिकामा गरी करिब ३० हजार जनालाई सहभागी गराइएको थियो ।

त्यसैगरी अमेरिकी राष्ट्रपति डोनाल्ड ट्रम्पले पनि नोभेम्बर ३ मा हुने राष्ट्रपतीय चुनावअघि नै खोप उपलब्ध हुने दाबी गरेका छन् । तर सुरक्षा मापदण्डलाई भन्दा पनि राजनीतिक फाइदाका लागि हतारमा खोप ल्याइए त्यसले झन् चुनौती थपिने वैज्ञानिकहरुले चिन्ता व्यक्ति गरेका छन् ।

(कान्तिपुर दैनिक)