फ्रान्सले उत्तर कोरिया र रुस बीचको बढ्दो सैन्य सहयोगबारे चिन्ता व्यक्त गरेको छ। दक्षिण कोरियाली गुप्तचर निकायले उत्तर कोरियाले युक्रेनमा मस्कोको युद्धलाई समर्थन गर्न धेरै सैनिक तैनाथ गरिरहेको बताएपछि फ्रान्सले चिन्ता प्रकट गरेको हो। 

‘युक्रेनमा रुसी युद्ध प्रयासका लागि उत्तर कोरियाको क्रस-सहयोग र सैन्य समर्थनमा वृद्धि धेरै चिन्ताजनक छ’, विदेश मन्त्रालयका प्रवक्ता क्रिस्टोफ लेमोइनले भने। शुक्रबार सोलको गुप्तचर निकायले उत्तर कोरियाले युक्रेनमा मस्कोको युद्धलाई समर्थन गर्न ‘ठूलो सङ्ख्यामा’ सैनिकहरू पठाउने निर्णय गरेको र एक हजार ५०० विशेष बलहरूले पहिले नै रुसको सुदूर पूर्वमा प्रशिक्षण लिइरहेको बताएको थियो ।

नाटो प्रमुख मार्क रुटेले गठबन्धनले अहिलेसम्म दक्षिण कोरियाको गुप्तचर जानकारीको पुष्टि गर्न नसकेको बताए। 

‘यदि यो जानकारी पुष्टि हुने हो भने यो अत्यन्त चिन्ताजनक र गम्भीर घटना हुनेछ’, लेमोइनले भने, ‘हामी उत्तर कोरिया र रुसलाई संयुक्त राष्ट्र सुरक्षा परिषद्का प्रस्तावहरूको पालना गर्न मात्र आह्वान गर्न सक्छौँ।’

दक्षिण कोरियाको गुप्तचर सेवाले उत्तर कोरियाले आफ्नो पहिलो दस्ताका एक हजार ५०० विशेष बल सैनिकहरूलाई रुसी सुदूर पूर्वको प्रशान्त बन्दरगाह शहर भ्लाडिभोस्टकमा तैनाथ गरेको र निकट भविष्यमा थप धेरै पठाउने बताएको छ।

उत्तर कोरियाली सैनिकहरूलाई रुसमा स्थानान्तरण गर्नु र पूर्वी युक्रेनमा सम्भावित तैनाथीले मस्कोले आक्रमणलाई तीव्र पार्न चाहेको देखाएको युक्रेनी राष्ट्रपति कार्यालयको एक वरिष्ठ स्रोतले बतायो।