माघ २१, २०८१ | 

काठमाडौं । अमेरिकी पूर्वराष्ट्रपति डोनाल्ड ट्रम्पले युद्धग्रस्त गाजाका नागरिकलाई इजिप्ट र जोर्डनमा शरण दिन सुझाव दिएका थिए। तर, पाँच प्रमुख अरब राष्ट्रले उनको प्रस्तावलाई संयुक्त रूपमा अस्वीकार गरेका छन्।

इजिप्टको कायरोमा बसेको बैठकपछि इजिप्ट, जोर्डन, साउदी अरब, कतार र संयुक्त अरब इमिरेट्सका विदेशमन्त्रीहरूले ट्रम्पको सुझावलाई अस्वीकार गर्ने निर्णय गरेका हुन्। उनीहरूले गाजावासीलाई आफ्नै भूमिमा पुनःस्थापित गर्दै शान्ति र पुनःनिर्माणलाई प्राथमिकता दिनुपर्ने बताएका छन्।

बैठकमा अरब लिगका महासचिव र प्यालेस्टिनी अधिकारीहरूको समेत सहभागिता थियो। छलफलपछि जारी संयुक्त वक्तव्यमा ट्रम्पको प्रस्तावले प्यालेस्टिनीको अधिकार हनन गर्ने र क्षेत्रीय अस्थिरता निम्त्याउने भन्दै अस्वीकृति जनाइएको छ।

पाँच राष्ट्रले गाजाका नागरिकलाई विस्थापित गर्न खोज्नु अन्तर्राष्ट्रिय कानुनविपरीत हुने भन्दै ट्रम्पको प्रस्तावले शान्ति प्रक्रियामा बाधा पुर्‍याउने निष्कर्ष निकालेका छन्। उनीहरूले संयुक्त राष्ट्रसंघीय निकाय यूएनआरडब्लूओ को विकल्प नरहेको र मध्यपूर्वमा शान्ति स्थापनाका लागि दुई-राज्य नीति नै उत्तम समाधान रहेको दोहोर्याएका छन्।

यसैबीच, कतारका प्रधानमन्त्री मोहम्मद बिन अब्दुल रहमान जासिम अल थानीले प्यालेस्टिनीलाई जबरजस्ती शरणार्थी बनाउने प्रयासले क्षेत्रीय द्वन्द्व थप चर्किन सक्ने चेतावनी दिएका छन्। इजिप्टले गाजा पुनःनिर्माणका लागि अन्तर्राष्ट्रिय सम्मेलनको सह-अध्यक्षता गर्ने प्रस्तावलाई बैठकले स्वागत गरेको छ।

हाल गाजामा जारी हिंसाका कारण लाखौं मानिस विस्थापित भइसकेका छन्। पाँच अरब राष्ट्रले अन्तर्राष्ट्रिय समुदायलाई गाजा पुनःनिर्माणका लागि सहयोग गर्न आग्रह गरेका छन्।