अमेरिकी राष्ट्रपति डोनाल्ड ट्रम्पले हमासलाई चेतावनी दिँदै, यदि शनिबार दिउँसो १२ बजेसम्म सबै इजरायली बन्धकहरू रिहा नगरे, इजरायलले गाजामा युद्धविराम सम्झौता तोड्नुपर्ने बताउनुभएको छ। ट्रम्पले भनेका छन्, "यदि सबै बन्धकहरू शनिबार १२ बजेसम्म फिर्ता नगरिए, म भन्छु, सम्झौता रद्द गरेर सबै शर्तहरू हटाउनुपर्छ र नरक खुला गर्नुपर्छ।" 

यसअघि, हमासले इजरायललाई युद्धविराम सम्झौताको उल्लङ्घन गरेको आरोप लगाउँदै थप बन्धकहरूको रिहाइ रोक्ने घोषणा गरेको थियो। यसले गाजामा जारी युद्धविरामलाई संकटमा पारेको छ। 

इजरायली प्रधानमन्त्री बेन्जामिन नेतान्याहूले पनि चेतावनी दिँदै, यदि बन्धकहरू शनिबारसम्म रिहा नगरे, इजरायलले गाजामा सैन्य कारबाही पुनः सुरु गर्ने बताउनुभएको छ l

यसबीच, हमासका अधिकारी सामी अबु जुह्रीले ट्रम्पको धम्कीलाई अस्वीकार गर्दै, युद्धविराम सम्झौतामा सबै पक्षले प्रतिबद्ध रहनुपर्ने बताएका छन्। 

गाजामा जारी युद्धविरामको क्रममा केही बन्धकहरूको रिहाइ भए पनि, अझै करिब ५० जना बन्धकहरू हमासको नियन्त्रणमा रहेका छन्। 

यसैबीच, ट्रम्पले गाजाका बासिन्दाहरूलाई इजिप्ट वा जोर्डनमा स्थानान्तरण गर्ने प्रस्ताव गरेका छन्, जसलाई ती देशहरूले अस्वीकार गरेका छन्। इजिप्ट र जोर्डनले गाजाको पुनर्निर्माण र दुई-राष्ट्र समाधानको आवश्यकता रहेको बताएका छन् l

संयुक्त राष्ट्रसंघका महासचिव एन्टोनियो गुटेरेसले पनि हमासलाई बन्धकहरूको रिहाइ जारी राख्न आग्रह गरेका छन्। 

गाजामा जारी युद्धविराम र बन्धकहरूको रिहाइको प्रक्रिया अनिश्चित बनेको छ, र अन्तर्राष्ट्रिय समुदायले दुबै पक्षलाई संयम अपनाउन आग्रह गरिरहेको छ।