पाकिस्तानका रक्षामन्त्री ख्वाजा आसिफले भारतले पाकिस्तानी भूमिमा कुनै सैन्य कारबाही गरे त्यसको कडा जवाफ दिने चेतावनी दिएका छन्।

इस्लामाबादमा बिहीबार प्रधानमन्त्री शाहबाज शरिफको अध्यक्षतामा बसेको राष्ट्रिय सुरक्षा परिषद् (NSC) को बैठकपछि आयोजित पत्रकार सम्मेलनमा बोल्दै उनले पाकिस्तान शान्ति चाहने राष्ट्र भए पनि देशको रक्षामा कुनै सम्झौता नगर्ने स्पष्ट पारे।

“आतंकवादी हमला निन्दनीय छन्, तर हाम्रो सार्वभौमिकता र नागरिकको सुरक्षाको विषयमा हामी कुनै कसर बाँकी राख्दैनौँ,” उनले भने।

आसिफले भारतका कुनै पनि दुस्साहसपूर्ण कदमको ‘उचित र बलियो जवाफ’ दिने चेतावनीसमेत दिए। “यदि भारतले हाम्रो कुनै पनि सहरमा हमला गर्छ वा पाकिस्तानी नागरिकलाई क्षति पुर्याउँछ भने, त्यसको जवाफ पनि उस्तै प्रभावशाली तरिकाले दिनेछौँ,” उनले जोड दिए।

यो चेतावनी जम्मु-कश्मीरको पहलगाममा अप्रिल २२ मा भएको आतंकवादी हमलापछि भारतले पाकिस्तानविरुद्ध चालेका कदमहरू — जस्तै सिन्धु जल सन्धि निलम्बन, अटारी सीमा बन्द जस्ता निर्णय — को पृष्ठभूमिमा आएको हो।

भारतको पछिल्लो निर्णयको प्रतिक्रिया स्वरूप पाकिस्तान सरकारले पनि बिहीबार भारतविरुद्ध विभिन्न ‘प्रत्युत्तरात्मक कदम’ घोषणा गरेको छ।