अमेरिकी उपराष्ट्रपति जेडी भान्सले अमेरिका इरानसँग प्रत्यक्ष युद्धमा नरहेको स्पष्ट पारेका छन्। बीबीसीसँगको कुराकानीमा उनले भनेका छन्, "हामी इरानको आणविक野 महत्वाकांक्षासँग लडिरहेका छौँ, न कि इरानसँगै।"

उनका अनुसार शनिबार राति अमेरिकाले इरानका आणविक केन्द्रहरूमा गरेको आक्रमणले उक्त देशको आणविक कार्यक्रम तहस–नहस भएको विश्वास गरिएको छ। साथै, उपराष्ट्रपति भान्सले अमेरिका र उसका साझेदारहरूले अब इरानको आणविक कार्यक्रमलाई स्थायी रूपमा अन्त्य गर्ने लक्ष्यका साथ काम गरिरहेको पनि दाबी गरेका छन्।

यसअघि, आइतबार पेन्टागनमा आयोजित पत्रकार सम्मेलनमा अमेरिकी रक्षामन्त्री पिट हेगसेथले आक्रमणबारे जानकारी दिँदै राष्ट्रपति डोनाल्ड ट्रम्पको अभिमत प्रस्तुत गरेका थिए। उनले भने, “राष्ट्रपति ट्रम्प शान्तिको पक्षमा छन्। उनी भन्छन् – म शान्ति चाहन्छु, आणविक हतियार होइन। इरानले पनि शान्तिको बाटो रोज्नुपर्छ।”

शनिबार राति अमेरिकाले इरानको फोर्डो, नातान्ज र इस्फहानस्थित आणविक सुविधाहरूमा लक्षित हमला गरेको पुष्टि भएको छ। यस सैन्य कारबाहीप्रति चीन र रुसले कडा आपत्ति जनाउँदै कूटनीतिक रूपमा अमेरिकाको आलोचना गरेका छन्।