अमेरिकाद्वारा इरानका आणविक केन्द्रमा हालै गरिएको आक्रमणबारे चीनका विदेशमन्त्री वाङ यी र इरानी विदेशमन्त्री अब्बास अरागचीबीच टेलिफोन संवाद भएको छ।

चीनको विदेश मन्त्रालयका प्रवक्ता लिन जियानले यो कुराकानीको जानकारी दिँदै सामाजिक सञ्जाल 'एक्स' मा लेखेका छन्, "अन्तर्राष्ट्रिय आणविक ऊर्जा एजेन्सी (IAEA) को निगरानीको बाबजुद इरानका आणविक स्थलहरूमा गरिएको आक्रमण संयुक्त राष्ट्रसंघको बडापत्र र अन्तर्राष्ट्रिय कानुनको गम्भीर उल्लंघन हो।"

उनका अनुसार यस्तो आक्रमणले आणविक चुहावट वा ठूलो दुर्घटना निम्त्याउने खतरा बोकेको छ, र यसलाई अन्तर्राष्ट्रिय समुदायले स्पष्ट रूपमा विरोध गर्नु आवश्यक छ।

चीनको विदेश मन्त्रालयले जारी गरेको विज्ञप्तिमा भनिएको छ, “इरानको सार्वभौमिकता र सुरक्षा सुनिश्चित गर्न गरिएको हरेक कदमप्रति चीन समर्थन व्यक्त गर्छ।”

चीनले युद्धविरामको लागि पहल गर्ने र मध्यपूर्वमा उत्पन्न तनावलाई सामान्य अवस्थामा फर्काउन रचनात्मक भूमिका खेल्ने बताइएको छ।

गत शनिबार राति अमेरिकाले इरानका तीन महत्वपूर्ण आणविक केन्द्र — फोर्डो, नातान्ज र इस्फहान — मा आक्रमण गरेको थियो।

यद्यपि केही अन्तर्राष्ट्रिय रिपोर्टहरूमा इरानको आणविक संरचना पूर्ण रूपमा ध्वस्त नभएको उल्लेख भएपछि पूर्वराष्ट्रपति डोनाल्ड ट्रम्पले ती रिपोर्टहरूको खण्डन गरेका छन्।