अमेरिकाले यदि आणविक हतियारको परीक्षण गर्‍यो भने, त्यसको जवाफ उस्तै तरिकाले र तत्काल दिने रुसले चेतावनी दिएको छ ।

रुसी उपविदेशमन्त्री सर्गेई र्याबकोभले अक्टोबर ८ मा आयोजित पत्रकार सम्मेलनमा अमेरिकाले लामो समयदेखि यस्ता परीक्षणका लागि आफ्नो पूर्वाधार तयार गरिरहेको आरोप लगाए। उनले भने, “यदि अमेरिकाले परीक्षण गर्छ भने हामी पनि ढिला नगरी त्यसैगरी प्रतिक्रिया जनाउनेछौं।” तर, उनले आफ्नो दाबीलाई प्रमाणित गर्ने कुनै ठोस प्रमाण प्रस्तुत गरेनन्।

यसअघि राष्ट्रपति भ्लादिमिर पुटिनले पनि चेतावनी दिँदै भनेका थिए, “हामी देखिरहेका छौँ कि अरू देशहरू तयारी गरिरहेका छन्। यदि उनीहरूले परीक्षण गरे भने, हामी पनि त्यस्तै गर्नेछौँ।”

रुसको सरकारी समाचार संस्था ‘तास’का अनुसार र्याबकोभले नयाँ ‘स्टार्ट’ आणविक सन्धिको विस्तारबारे अमेरिकाबाट अहिलेसम्म औपचारिक प्रतिक्रिया नआएको उल्लेख गरेका छन्।

गत सेप्टेम्बर २२ मा पुटिनले यस सन्धिको अवधि २०२६ फेब्रुअरीमा सकिएपछि पनि रुस कम्तीमा एक वर्षसम्म सन्धिका सर्तहरू पालना गर्न तयार रहेको बताएका थिए।

अमेरिकी राष्ट्रपति डोनाल्ड ट्रम्पले अक्टोबर ५ मा पुटिनको प्रस्तावलाई सकारात्मक विचार भएको टिप्पणी गरेका थिए।