अमेरिकाले युक्रेनसँग शान्ति सम्झौतामा मस्कोलाई दबाबमा पार्ने उद्देश्यले रुसका दुई प्रमुख तेल कम्पनीहरू रोसनेफ्ट र लुकोइलमाथि नयाँ प्रतिबन्ध लगाउने घोषणा गरेको छ। अमेरिकी राष्ट्रपति डोनाल्ड ट्रम्पले बुधबार प्रतिबन्ध सार्वजनिक गर्दै भने, “हरेक पटक म भ्लादिमिर (पुटिन)सँग कुरा गर्छु, वार्ता राम्रो हुन्छ तर प्रगति हुँदैन।”

ट्रम्पले यो कुरा नेटो महासचिव मार्क रुटसँगको भेटवार्तापछि बताएका हुन्, जहाँ दुवैले युक्रेनमा जारी युद्ध र शान्ति प्रक्रियाबारे विस्तृत छलफल गरेका थिए। अमेरिकाको यस निर्णयलाई रुसले कडा आपत्ति जनाउँदै चेतावनी दिएको छ कि प्रतिबन्धहरूले विश्वका विकासशील देशहरूको **ऊर्जा आपूर्ति (तेल र ज्ञ्ास)**मा नकारात्मक असर पार्नेछ।

यसबारे अमेरिकी अर्थमन्त्री स्कट बेसन्टले स्पष्ट गर्दै भने, “पुटिनले युद्ध रोक्न अस्वीकार गरेकाले यी प्रतिबन्ध आवश्यक बनेका हुन।” उनका अनुसार ती तेल कम्पनीहरूले रुसलाई युद्धका लागि आर्थिक बल प्रदान गरिरहेका छन। उनले थपे, “अब निर्दोष मानिसहरूको हत्या रोक्ने र तुरुन्तै युद्धविराम गर्ने समय आएको छ।”

एक दिनअघि मात्रै ट्रम्पले हंगेरीको राजधानी बुडापेस्टमा तय गरिएको पुटिनसँगको भेट अनिश्चितकालका लागि स्थगित गरिएको घोषणा गरेका थिए। त्यसको केही घण्टा अघि रुसले युक्रेनमा भीषण हवाई आक्रमण गरेको थियो, जसमा बालबालिकासहित कम्तीमा सात जनाको मृत्यु भएको बताइन्छ।

ह्वाइट हाउसमा आयोजित पत्रकार सम्मेलनमा ट्रम्पले पुटिनमाथि तीव्र प्रहार गर्दै भने, “उनी शान्तिको कुरा गर्छन्, तर त्यसमा गम्भीर छैनन।” उनले नयाँ प्रतिबन्धबाट समाधानको बाटो खुल्ने आशा व्यक्त गर्दै थपे, “अब समय आएको छ—हामीले धेरै पर्ख्यौं।” उनका अनुसार यदि रुसले युद्ध रोक्ने निर्णय गर्‍यो भने यी प्रतिबन्ध हटाइनेछन।

मार्क रुटले पनि अमेरिकाको कदमको समर्थन गर्दै भने, “यो पुटिनमाथि दबाब बढाउने एक महत्वपूर्ण कदम हो।” उनका अनुसार यस्तो कडा नीति बिना रुसलाई वार्ताको टेबलमा ल्याउन कठिन हुन्छ।

यसअघि गत हप्ता बेलायतले पनि रोसनेफ्ट र लुकोइलमाथि यस्तै आर्थिक प्रतिबन्ध घोषणा गरेको थियो। बेलायती अर्थमन्त्री राचेल रिभ्सले भनिन्, “विश्व बजारमा रूसी तेलको अब कुनै ठाउँ छैन l रूसले जबसम्म युद्ध रोक्दैन, आर्थिक दबाब जारी रहनेछ।”