काठमाडौँ | इजरायलले मङ्गलबार इरानका राष्ट्रिय सुरक्षा प्रमुख तथा प्रभावशाली नेता अली लारीजानीको हत्या गरिएको दाबी गरेको छ। यद्यपि उक्त घटनाबारे समाचार तयार पार्दासम्म इरानको आधिकारिक प्रतिक्रिया सार्वजनिक भएको छैन।

यदि इजरायलको दाबी सत्य सावित भएमा मध्यपूर्वमा जारी युद्धको दुई हप्ताभन्दा बढी अवधिपछि इरानका लागि यो अर्को ठूलो क्षति मानिनेछ। इजरायली रक्षामन्त्री इजरायली काट्जका अनुसार लारीजानीको ‘गत राति’ भएको आक्रमणमा मृत्यु भएको हो।

यसअघि फागुन १६ गते भएको अमेरिका–इजरायल संयुक्त आक्रमणमा सन् १९८९ यता इरानका सर्वोच्च नेता रहेका अयातोल्लाह अली खामेनीको मृत्यु भएको खबर सार्वजनिक भएको थियो। त्यसको केही समयमै लारीजानीको मृत्युको दाबी आउनुले इरानमाथि थप दबाब सिर्जना भएको देखिन्छ।

६८ वर्षीय लारीजानीलाई इरानको रणनीतिक तथा कूटनीतिक नीति निर्माणमा प्रमुख भूमिका खेल्ने ‘भित्री नेतृत्व’ का रूपमा हेरिने गरिन्थ्यो। उहाँ पूर्व सर्वोच्च नेता खामेनीका निकट सहयोगी हुनुका साथै दशकौँदेखि तेहरानको परमाणु नीति र कूटनीतिमा प्रभावशाली व्यक्तिका रूपमा चिनिनुहुन्थ्यो।

युद्ध सुरु भएपछि उहाँको प्रभाव झनै बढेको बताइन्छ। नयाँ सर्वोच्च नेता मोजतबा खामेनी सार्वजनिक रूपमा कम देखिए पनि लारीजानी भने हालै तेहरानमा आयोजित सरकार समर्थक र्यालीमा सहभागी भएको देखिएको थियो।

तेहरानमा रहेका एक अन्तर्राष्ट्रिय समाचार संस्थाका पत्रकारले राति तीव्र विस्फोट र बमबारी भएको पुष्टि गरेका छन्। यता इजरायलले लारीजानीको हत्या भएको दाबी गरेपछि पनि उहाँको आधिकारिक सामाजिक सञ्जालबाट हालै एक सन्देश सार्वजनिक भएको छ, जसमा इरानी नाविकप्रति श्रद्धाञ्जली व्यक्त गरिएको छ। उक्त सन्देशमा मृत्युको दाबीबारे कुनै उल्लेख गरिएको छैन।

यसैबीच इजरायलले इरानको रिभोलुसनरी गार्ड्सअन्तर्गत बासिज अर्धसैनिक बलका प्रमुख घोलामरेजा सुलेमानीको पनि हत्या गरिएको दाबी गरेको छ। साथै, प्यालेस्टिनी इस्लामिक जिहाद समूहका एक सैन्य नेतामाथि आक्रमण गरिएको तर मृत्युको पुष्टि नभएको जनाइएको छ।

सन् २०२३ अक्टोबर ७ यता इजरायलले हमासको आक्रमणपछि विभिन्न क्षेत्रका शीर्ष नेताहरूलाई लक्षित गर्दै आक्रमणको रणनीति अपनाउँदै आएको विश्लेषकहरू बताउँछन्। यता नयाँ सर्वोच्च नेता मोजतबा खामेनीको अवस्थाबारे अझै स्पष्ट जानकारी नआएकाले विभिन्न अड्कलबाजी भइरहेका छन्।