वासिङ्टन । लेबननमा इसराइलले सैन्य कारबाही तीव्र बनाएपछि अमेरिकी राष्ट्रपति डोनाल्ड ट्रम्प र इसराइली प्रधानमन्त्री बेन्जमिन नेतन्याहूबीचको सम्बन्धमा नयाँ तनाव देखिएको छ। अमेरिकी सञ्चारमाध्यम एक्सियसका अनुसार ट्रम्पले हालैको टेलिफोन संवादमा नेतन्याहूप्रति कडा असन्तुष्टि व्यक्त गरेका थिए।

रिपोर्टअनुसार हिजबुल्लाहविरुद्धको अभियानको नाममा इसराइलले लेबनन, विशेषगरी बेरूत क्षेत्रमा थप आक्रमणको तयारी गरिरहेको जानकारी पाएपछि ट्रम्प आक्रोशित बनेका थिए। सोमबार भएको फोनवार्तामा उनले इसराइलको कदमले क्षेत्रीय तनावलाई थप चर्काउने र अन्तर्राष्ट्रिय स्तरमा इसराइललाई थप एक्ल्याउने चेतावनी दिएका थिए।

अमेरिकी अधिकारीहरूलाई उद्धृत गर्दै एक्सियसले ट्रम्पले नेतन्याहूसँग अत्यन्तै कडा भाषामा कुरा गरेको जनाएको छ। वार्ताका क्रममा ट्रम्पले इसराइलको सैन्य रणनीतिप्रति असन्तुष्टि जनाउँदै बेरूतमा थप हमला नगर्न आग्रह गरेका थिए। त्यसपछि इसराइलले प्रस्तावित सैन्य कारबाही स्थगित गरेको दाबी गरिएको छ।

यता नेतन्याहूले भने वार्तापछि जारी वक्तव्यमा हिजबुल्लाहले इसराइलविरुद्धका गतिविधि नरोक्दासम्म सुरक्षा कारबाही जारी रहने स्पष्ट पारेका छन्। उनले दक्षिणी लेबननमा सैन्य अभियान निरन्तर सञ्चालन हुने र आवश्यक परे थप कदम चालिने संकेत दिएका छन्।

यसैबीच, इरानसँग जारी कूटनीतिक संवादलाई प्राथमिकता दिन चाहने ट्रम्प र इरानमाथि थप दबाब सिर्जना गर्नुपर्ने धारणा राख्ने नेतन्याहूबीच लामो समयदेखि रणनीतिक मतभेद रहँदै आएको विश्लेषण गरिएको छ। ट्रम्पले वार्तामार्फत समाधान खोज्नुपर्ने पक्षमा जोड दिँदै आएका छन् भने नेतन्याहूले इरान र उसका समर्थक समूहहरूमाथि कडा सैन्य दबाब आवश्यक रहेको बताउँदै आएका छन्।

अमेरिकी प्रशासनका स्रोतहरूका अनुसार लेबननमा सर्वसाधारणको बढ्दो क्षति र सैन्य कारबाहीका कारण मध्यपूर्वमा थप अस्थिरता उत्पन्न हुने सम्भावनाले ट्रम्प चिन्तित छन्। यही कारण उनले पछिल्ला दिनमा इसराइलको आक्रामक रणनीतिप्रति खुला रूपमा असहमति जनाउन थालेका छन्।

विश्लेषकहरूका अनुसार ट्रम्प-नेतन्याहू सम्बन्धमा देखिएको पछिल्लो तनावले मध्यपूर्वको सुरक्षा अवस्था, इरानसँगको सम्भावित वार्ता तथा क्षेत्रीय शक्ति सन्तुलनमा समेत प्रभाव पार्न सक्नेछ।