News Desk
जेनजी आन्दोलनका क्रममा देशभरका २७ कारागारबाट १४,५५५ जना कैदीबन्दी फरार भए। तीमध्ये ५,४३४ जना पुनः फर्किएका छन् भने ९,१२१ जना अझै फरार छन्।
केन्द्रीय कारागार सुन्धाराबाट मात्रै ३,५२३ जना भाग्दा १,१३४ जना फिर्ता भइसकेका छन्। नक्खु कारागारबाट रवि लामिछानेसहित कैदी निकालिएपछि अन्यत्र पनि भागाभाग सुरु भएको थियो।
काभ्रे, सुन्धारा, नक्खु लगायतका कारागारमा प्रहरीले नियन्त्रण लिँदा कैदी पक्राउ वा आफैं फर्किएका छन्। केही ठाउँमा सेनाले गोली चलाउँदा धादिङ, रामेछाप र बाँकेमा १० कैदीको मृत्यु भएको छ।
प्रहरीका सयौँ भवन, गाडी, हतियार र पोसाक जलेर वा लुटिएपछि स्थानीयले पनि सुरक्षामा साथ दिइरहेका छन्। प्रहरी तत्कालै मनोबल उठाउन सरकारसँग आग्रह गरिरहेको छ।
