News Desk
इण्डियन प्रिमियर लिग (आईपीएल) को उद्घाटन खेलमा चेन्नई सुपर किंग्सले मुम्बई इण्डियन्सलाई ४ विकेटले पराजित गर्दै विजयी यात्रा सुरु गरेको छ।
आइतबार राति एमए चिदम्बरम स्टेडियममा भएको खेलमा मुम्बईले टस गुमाएर पहिला ब्याटिङ गर्दै निर्धारित २० ओभरमा ९ विकेटको क्षतिमा १५५ रनको योगफल खडा गर्यो। चेन्नईले यो लक्ष्य १९.१ ओभरमै ६ विकेट गुमाएर पूरा गर्यो।
पहिलो ब्याटिङ गरेको मुम्बईका लागि तिलक वर्माले सर्वाधिक ३१ रन बनाए। कप्तान सूर्यकुमार यादवले २९ रनको योगदान दिए भने नमन धिर (१७), रायन रिकेन्टन (१३) र मिचेल सान्टनर (११) ले दोहोरो अंक छुन सफल भए।
चेन्नईको बलिङतर्फ नुर अहमदले उत्कृष्ट प्रदर्शन गर्दै ४ विकेट लिए, उनले मात्र १८ रन खर्चिए। खलिल अहमदले पनि आक्रामक बलिङ गर्दै ३ विकेट झारे। नाथन एलिस र रविचन्द्रन अश्विनले समान १-१ विकेट लिए।
१५६ रनको लक्ष्य पछ्याउने क्रममा चेन्नईका ओपनर रचिन रविन्द्रले उत्कृष्ट पारी खेले। उनले ४५ बलमा २ चौका र ४ छक्कासहित अविजित ६५ रन जोडे। कप्तान रितुराज गायकवाडले पनि आक्रामक प्रदर्शन गर्दै २६ बलमा ६ चौका र ३ छक्का प्रहार गर्दै ५३ रन बनाए।
रविन्द्र जडेजाले १७ रन बनाएर रन आउट भए, जबकि अन्य ब्याटरले प्रभाव पार्न सकेनन्। मुम्बईका बलर भिगनेसले ३ विकेट लिए भने दीपक चाहर र विल ज्याक्सले समान १-१ विकेट लिए।
यो जितसँगै चेन्नई सुपर किंग्सले आईपीएलको नयाँ सिजनलाई उत्साहजनक सुरुवात गरेको छ।
