एनपिएलमा काठमाडौं गोर्खाजले उत्कृष्ट प्रदर्शन गर्दै दोस्रो जीत दर्ता गरेको छ।  काठमाडौंले लुम्बिनी लायन्सलाई २२ रनले पराजित गर्‍यो। कप्तान करण केसीको आगो ओकल्ने ब्याटिङ काठमाडौंको जितको मुख्य आधार बन्यो। लगातार दोस्रो पटक हार व्यहोरेको लुम्बिनीका लागि यो खेल पनि निराशाजनक बन्यो।

१ सय ५८ रनको लक्ष्य पछ्याएको लुम्बिनी १९.१ ओभरमै आल आउट हुँदै १ सय ३५ रनमा रोकियो। टोलीले सुरुवातमै कमजोर प्रदर्शन गर्‍यो। पावरप्लेमा लुम्बिनीले ३ विकेट गुमाउँदै ४९ रन मात्रै जोड्यो। मिलिन्द कुमारले दुई ओपनरलाई पविलियन फर्काए। सन्दीप जोरा ७ रनमा, र डार्सी सर्ट २२ रनमा आउट भए।

गुलबद्दीन नाइब पनि टिकाउ साझेदारी गर्न असफल रहे—६ बलमा ११ रन जोडेर साहब अलामको बलमा क्याच भए। आठौं ओभरमा इरासमसले कप्तान रोहित पौडेल (११ रन) लाई एलबिडब्लु गर्दै दबाब थपिदिए। ८ ओभरमा ६४ रन जोडेको लुम्बिनीलाई त्यसपछि ठूलो साझेदारी आवश्यक थियो, तर ११औं ओभरमै जेजे स्मिथ ८ रनमै आउट भए र सुमित महर्जन रनबिहीन रनआउट हुँदा स्थिति झन् गम्भीर बन्यो।

१२ औं ओभरमा रुबेन ट्रम्पलम्यान ५ रनमा आउट भएपछि लुम्बिनी ७२/६ को अवस्थामा पुगेको थियो। त्यसपछि दवाब झन् बढ्दै गयो। दीलिप नाथले २५ रन बनाए पनि करणको बलमा क्याच आउट भए। शेर मल्लले १७ बलमा २६ रन प्रहार गर्दै केही आशा जगाए—उनको १७ औं ओभरमा ३ छक्कासहित २० रन आएको थियो। तर, विजयका लागि चाहिएको ३३ रन १८ बलमा जोड्ने अवसर उनी रनआउट हुँदा समाप्त भयो। अन्तिममा लुम्बिनी १३५ रनमै सीमित रह्यो।

काठमाडौंका बलरमध्ये मिलिन्द र इरासमसले २–२ विकेट लिए भने करण, रसिद, साहब र सन्तोषले १–१ विकेट निकाले।

यसअघि टस जितेको लुम्बिनीले फिल्डिङ रोजे पनि काठमाडौंले २० ओभरमा ८ विकेट गुमाउँदै १५७ रन बनायो—जारी सिजनको सर्वाधिक स्कोर।
पावरप्लेमा काठमाडौंले २ विकेट गुमाउँदै ४२ रन जोड्यो। बेन चाल्सवर्थ पहिलो बलमै रन नबनाई आउट भए, रसिद खान पनि २८ रनको स्थितिमा पविलियन फर्किए। १० ओभरसम्म काठमाडौं ५६/३ मा सीमित थियो।

आकाश त्रिपाठीले ३६ बलमा ३२ रन बनाए—तर खराब शट खेल्दै आउट हुँदा टोली पुनः दबाबमा आयो। त्यसपछि जोन सिम्पसनले रोहितको ओभरमा छक्का प्रहार गरे पनि त्यही ओभरमा १७ रनमा आउट भए। मिलिन्द पनि १७ रनमा उत्कृष्ट क्याचका साथ पविलियन फर्किए।

यानंतर सन्तोष–इरासमसले ३६ रनको साझेदारी गर्दै टोलीलाई सम्हाल्ने प्रयास गरे। सन्तोषले १६ बलमा २ छक्कासहित २६ रन बनाए। इरासमस १७ रनमा आउट भएपछि स्कोर ११७/७ थियो।

१९औं ओभर काठमाडौंका लागि टर्निङ पोइन्ट बन्यो—करण केसीले रुबेन ट्रम्पलम्यानमाथि ४ छक्का प्रहार गर्दै केवल १ ओभरमै ३१ रन जोडे। करणले ११ बलमा ४ छक्का र १ चौकासहित अविजित ३४ रन बनाए। अन्तिम ओभरमा आदिल अलाम १ रनमै आउट भए तर स्कोर १५७ पुग्यो।

लुम्बिनीका रुबेन, सेर, गुलबद्दीन र रोहितले समान २–२ विकेट पाए।

चार खेल खेलेको काठमाडौंले दोस्रो जीतसँगै ४ अंक बनाएको छ। जनकपुर विरुद्धको पहिलो जीतपछि लगातार दुई खेल हारेको काठमाडौंले आजको खेलमा पुनः लय फर्काएको छ।
लुम्बिनीले भने तीन खेलमा दुई हार व्यहोर्दै २ अंकमै सीमित छ। चितवनमाथि पहिलो खेल जितेको लुम्बिनी कर्णालीसँग ठुलो अन्तरले हारेपछि आज पनि निराश रह्यो।

भोलि विराटनगर किंग्स र चितवन राइनोजबीच रोमाञ्चक भिडन्त हुनेछ।