जनकपुर बोल्ट्सले नेपाल प्रिमियर लिग (एनपीएल) दोस्रो संस्करणलाई निराशाजनक रुपमा टुंग्याएको छ। लगातार चार खेलमा पराजित हुँदै कमजोर सुरुआत गरेको जनकपुरले आइतबार लिग चरणको अन्तिम खेलमा पनि कर्णाली याक्ससँग ३ रनको हार बेहोर्दै प्रतियोगिताबाट बाहिरिने क्रममा कुनै सुधार देखाउन सकेन।

कीर्तिपुरस्थित त्रिवि क्रिकेट मैदानमा कर्णालीले दिएको १३० रनको लक्ष्य पछ्याउँदै मैदानमा उत्रिएको जनकपुरले निर्धारित २० ओभरमा ७ विकेट गुमाएर १२६ रन मात्रै जोड्न सक्यो। दुवै टोली प्लेअफ प्रतिस्पर्धाबाट पहिले नै बाहिरिसकेकाले यो खेल औपचारिकता जस्तै भए पनि जनकपुरको कमजोर प्रदर्शन अझै दोहोरियो।

जितसँगै कर्णाली याक्सले ७ खेलमा ४ अंक हासिल गर्दै छैटौँ स्थानमा प्रतियोगिता समापन गर्यो। उता जनकपुर बोल्ट्सले २ अंकमा सिमित रहँदै आठौँ स्थानमा रहेर यात्रा टुंग्यायो।

लिगभर जनकपुरले काठमाण्डू गोर्खाज, विराटनगर किङ्स, पोखरा एभेन्जर्स र सुदूरपश्चिम रोयल्ससँग हार बेहोरेको थियो। चितवन राइनोजमाथि ६ विकेटको जित हात पारे पनि त्यसलाई निरन्तरता दिन सकेन। लुम्बिनी लायन्ससँग पनि ४ विकेटको नतिजा सुम्पिएको थियो।

जनकपुरका लागि सञ्जय कृष्णमुर्ति मात्र चम्किए। उनले ३९ बलमा ५१ रन बनाए, जसमा १ चौका र ४ छक्का समावेश थिए। संगित कोरेले २५ रन जोड्दा अन्य ब्याटरको प्रदर्शन निराशाजनक रह्यो। कर्णालीका विलियन बसिस्टोले २ विकेट लिए।

यसअघि टस हारेर ब्याटिङ गरेको कर्णाली याक्सले २० ओभरमा ९ विकेट गुमाएर १२९ रन बनाएको थियो। ओपनर इमरान शेखले ३२ बलमा ३३ रन योगदान दिए। कप्तान सोमपाल कामी अविजित १८ रनमा रहे। अन्यमा गुल्सनकुमार झा १९, प्रियांक पन्चाल १८ र बसिस्टो १५ रनमा आउट भए।

जनकपुरका ललितनारायण राजवंशी र आदित्य महताले समान २–२ विकेट लिए।