टाटा सन्सका पूर्व अध्यक्ष रतन टाटाको बुधबार राति मुम्बईको अस्पतालमा ८६ वर्षको उमेरमा निधन भयो। 

टाटा सन्सका अध्यक्ष एन चन्द्रशेखरनले टाटाको निधनको पुष्टि गर्दै उनलाई आफ्नो "मित्र, गुरु, र मार्गदर्शक"को रूपमा उल्लेख गरेका छन्। उनले निधनको कारण भने खुलाएका छैनन्।

टाटा यसै हप्ता दक्षिण मुम्बईको ब्रीच क्यान्डी अस्पतालमा भर्ना भएका थिए। अस्पताल भर्ना भए लगत्तै सोमबार टाटाले एक वक्तव्य जारी गर्दै आफ्नो स्वास्थ्यको बारेमा चिन्ता गर्नुपर्ने कुनै कारण नरहेको र उमेरसम्बन्धी स्वास्थ्य जाँचका लागि मात्र अस्पताल गएको बताएका थिए।

प्रधानमन्त्री नरेन्द्र मोदीले टाटालाई एक दूरदर्शी नेता र दयालु तथा असाधारण व्यक्तित्वको रूपमा वर्णन गरेका छन्।

“उनी भारतको पुरानो र प्रतिष्ठित व्यवसायिक घरानालाई स्थिर नेतृत्व प्रदान गर्ने व्यक्ति थिए। त्यही समयमा, उनको योगदान बोर्डरूमभन्दा बाहिर पनि निकै ठूलो थियो,” मोदीले एक्समा भने।