विवादित भूमिसम्बन्धी अध्यादेश फिर्ता गर्ने तयारीमा सरकारपुगेको छ।  अध्यादेश पास हुनसक्ने अवस्था नबनेपछि फिर्ता गर्ने तयारीमा सरकार पुगेको हो। 

सरकारले संसद अधिवेशनको मुखैमा विभिन्न ६ वटा अध्यादेश ल्याएको थियो। तीमध्ये भूमिसम्बन्धी अध्यादेश भने भूमाफिया, दलाल र बिचौलिया पोस्ने गरी ल्याइएको भन्दै विपक्षीले मात्रै नभई सत्तासाझेदार र सरकार समर्थित दलले नै आपत्ति जनाउँदै आएका छन। 

अध्यादेश पास गर्न सरकालाई प्रतिनिधिसभामा कुनै समस्या नभए पनि राष्ट्रियसभाबाट अघि बढाउन सत्ता समर्थित जसपा नेपालको साथ अनिवार्य छ। तर उसलाई फकाउने प्रयास विफल हुनुका साथै सत्तामै रहेको लोसपालेसमेत साथ नदिएपछि फिर्ता लिने निष्कर्षमा सरकार पुगेको हो। 

सत्तारुढ दलका नेताहरू यही विषयमा अहिले छलफलमा छन । कांग्रेसका एक नेताका अनुसार भोलि २१ गते अन्य पाँच अध्यादेश भने अघि बढ्नेछ। उनले भने, ‘अहिले हामी यही विषयमा छलफल गरिरहेका छौँ। अन्य पाँच अध्यादेश मात्र भोलि संसद्मा अघि बढ्छ।’