जल तथा मौसम विज्ञान विभागको मौसम पूर्वानुमान महाशाखाले आज (असार १३, शुक्रबार) का लागि वर्षासम्बन्धी सम्भावित अवस्थाबारे जानकारी सार्वजनिक गरेको छ।

महाशाखाले बिहान ६ बजे जारी गरेको संक्षिप्त बुलेटिन अनुसार:

🔹 दिउँसोको अवस्था:
आज दिउँसो गण्डकी, लुम्बिनी, कर्णाली र सुदूरपश्चिम प्रदेशका साथै अन्य प्रदेशका पहाडी भेगका केही स्थानहरूमा तथा बाँकी भूभागका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना देखिएको छ।
गण्डकी, लुम्बिनी, कर्णाली, सुदूरपश्चिम प्रदेशसँगै कोसी र बागमती प्रदेशका पहाडी क्षेत्रमा एक-दुई स्थानमा भारी वर्षा हुनसक्ने अनुमान गरिएको छ।
यसका साथै, देशभरका उच्च पहाडी र हिमाली भूभागका थोरै स्थानहरूमा हल्कादेखि मध्यम वर्षा वा हिमपात हुनसक्ने सम्भावना छ।
कोसी, बागमती, गण्डकी र लुम्बिनी प्रदेशका तराई क्षेत्रहरू तथा मधेस प्रदेशका केही स्थानमा हावाहुरीको पनि पूर्वानुमान गरिएको छ।

🔹 रातिको अवस्था:
रातिको समयमा कोसी, बागमती, गण्डकी, लुम्बिनी र सुदूरपश्चिम प्रदेशका केही स्थानहरूमा तथा बाँकी प्रदेशका थोरै स्थानहरूमा मेघगर्जनसहित हल्कादेखि मध्यम वर्षा हुने सम्भावना छ।
कोसी, गण्डकी, लुम्बिनी र सुदूरपश्चिम प्रदेशका एक-दुई स्थानहरूमा भारीदेखि अत्यधिक भारी वर्षा पनि हुनसक्ने छ।
कोसी र बागमती प्रदेशका उच्च पहाडी तथा हिमाली भेगमा केही स्थानमा र अन्य प्रदेशका उच्च भेगमा एक-दुई स्थानमा हल्कादेखि मध्यम वर्षा वा हिमपातको सम्भावना रहेको महाशाखाले जनाएको छ।