ऊर्जा, सिँचाइ तथा जलस्रोतमन्त्री कुलमान घिसिङले विद्युत् विकास विभागको नेतृत्व मनदेवी श्रेष्ठलाई जिम्मेवारीस्वरूप तोकेका छन्। मन्त्रीस्तरीय निर्णयअनुसार हाल विभागका महानिर्देशक जीवछ मण्डललाई जल तथा ऊर्जा आयोगमा सरुवा गर्दै विभागको प्रमुखमा मनदेवीलाई नियुक्त गरिएको हो।

मनदेवी यसअघि सोही विभागकी उपमहानिर्देशक थिइन्। कुलमान निकट स्रोतका अनुसार, वरिष्ठता र प्राथमिकताको आधारमा मनदेवीलाई नेतृत्व दिने निर्णय गरिएको हो। “उहाँ वरिष्ठतामा अगाडि हुनुहुन्थ्यो र महिला भएकाले प्राथमिकताका आधारमा समेत नेतृत्व प्राप्त गर्नुभयो,” स्रोतले जनाएको छ।

जलविद्युत् इन्जिनियर मनदेवीलाई विभागको पहिलो महिला प्रमुखका रूपमा नियुक्ति दिइएको हो। यसअघि विभागका महानिर्देशक रहेका जीवछ मण्डललाई जल तथा ऊर्जा आयोगमा पठाइएको छ। उनी पूर्वमा नेपाल विद्युत् प्राधिकरणका कार्यकारी निर्देशकका रूपमा कार्यरत रहँदा तत्कालीन मन्त्री दीपक खड्कालाई सहयोग गर्दै कुलमानलाई कार्यसम्पादन मूल्याङ्कनमा शून्य अंक दिई पदबाट हटाउने पक्षमा भूमिका खेलेका थिए।

मण्डलको उक्त निर्णयलाई गैरव्यावसायिक र पक्षपातपूर्ण भन्दै त्यतिबेला व्यापक आलोचना भएको थियो। यो सरुवालाई कतिपयले पुरानो विवादसँग पनि जोडेर हेरेका छन्।