जेन-जी मुभमेन्ट अलायन्सले अख्तियार दुरुपयोग अनुसन्धान आयोग (CIAA) का प्रमुख आयुक्त प्रेमकुमार राईसहित सबै आयुक्तहरूको तत्काल राजीनामा माग गरेको छ। अलायन्सले आफ्नो आन्दोलनलाई भ्रष्टाचारविरुद्धको अभियानका रूपमा चित्रित गर्दै अख्तियारका नेतृत्वकर्ताले नै संस्थाको विश्वसनीयता गुमाएको आरोप लगाएको छ।

अलायन्सको भनाइअनुसार आयोगका प्रमुख र आयुक्तहरूको नियुक्ति तत्कालीन प्रधानमन्त्री केपी शर्मा ओलीको नेतृत्वमा संसदीय सुनुवाइ विना गरिएको थियो, जसले अख्तियारको स्वतन्त्रता र निष्पक्षतामा प्रश्न उठाएको छ। अलायन्सले अन्तरिम सरकारलाई खुला र पारदर्शी आवेदन प्रक्रियामार्फत योग्य र सक्षम व्यक्तिलाई नयाँ आयुक्तका रूपमा नियुक्त गर्न आग्रह गरेको छ।

यसैबीच, सुदन गुरुङ नेतृत्वको अर्को जेन-जी समूहले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई तत्काल पक्राउ गर्न माग गरेको छ। गुरुङले सामाजिक सञ्जालमार्फत ओली र लेखकलाई गिरफ्तारी गर्नुपर्ने भन्दै अभियान सुरू गरेका छन्।

‘दि काउन्सिल अफ जेन-जी’ नामबाट सार्वजनिक गरिएको पोस्टमा दुई नेतालाई तत्काल पक्राउ नगरे कडा कदम चाल्न बाध्य हुने चेतावनी दिइएको छ। यो पोस्ट फेसबुक र इन्स्टाग्रामलगायत सामाजिक सञ्जालमा तीव्र रूपमा भाइरल भएको छ, जहाँ सयौं प्रयोगकर्ताले सेयर र प्रतिक्रिया दिएका छन्।