वीरगञ्ज - जनता समाजवादी पार्टी (जसपा) र नेकपा एमालेको गठबन्धनका उम्मेदवारहरुले रोड शो कार्यक्रमलाई निरन्तरता दिएका छन् । आगामी मंसिर ४ गते हुने प्रतिनिधिसभा र प्रदेशसभाको निर्वाचनलाई मध्यनजर गर्दै जसपा र एमालेको गठबन्धनका उम्मेदवारहरुले वीरगञ्ज महानगरपालिकाका विभिन्न वडा तथा टोलहरुमा निरन्तर रोड शो गरीरहेका छन् । गठबन्धनका तर्फबाट पर्सा निर्वाचन क्षेत्र नम्बर १ मा प्रतिनिधिसभा सदस्य पदका उम्मेदवार प्रदीप यादव र प्रदेशसभा सदस्य उम्मेदवारद्वय विचारी यादव र मोहम्मद लालबाबु राउत गद्दीले आज वीरगञ्ज महानगरपालिकाको वडा नम्बर २ को छपकैया, वडा नम्बर ४ को विर्ता, वडा नम्बर ५ को कुम्हाल टोल र वडा नम्बर ७ को राम टोल र गहवामा संयुक्त रोड शो गरेका हुन् ।

रोड शोका क्रममा पर्साको क्षेत्र नम्बर १ बाट प्रतिनिधि सभा सदस्यका उम्मेदवार प्रदीप यादवको पक्षमा मतदाताले सकारात्मक प्रतिक्रिया दिइरहेका छन् । पूर्व वन तथा वातावरणमन्त्रीसमेत रहेका यादवको कार्यकालमा उल्लेख्य विकास निर्माणका काम भएको हुँदा फेरी यादवलाई जिताउने मतदाताको मत छ । क्षेत्र नम्बर १ मा फेरी पनि यादवकै जितको आवश्यक्ता औँल्याउँदै स्थानीयले यादवको जित सुनिश्चित भएको बताए । मन्त्री बन्दाको अवस्थामा पनि कुनै घमन्ड नभएर आम नागरिकसँग गर्ने सदबहार व्यावहारको जनताले सह्रानासमेत गरेका छन् । जनताले खोजेको र सोचेको नेता यादवको विकल्पमा क्षेत्र नम्बर १ मा कोही हुन नसक्ने पनि उनीहरुले ठोकुवा गरेका छन् । जनताको आशिर्वाद र शुभेच्छाका कारण आफु नै पुनः निर्वाचित हुने यादवको बिश्वास छ ।

आफ्नो कार्यकालमा क्षेत्र नम्बर १ मात्रै नभएर समग्र पर्सा जिल्लाकै विकासलाई प्राथमिकतामा राखेको बताउँदै यादवले आगामी दिनमा पनि शिक्षा, स्वास्थ्य, कृषि, रोजगार लगायतका एजेण्डालाई प्राथमिकता दिने प्रतिबद्धता व्यक्त गरेका छन् । यसैबिच जसपाले वडा नम्बर ४ मा सम्पर्क कार्यालय पनि स्थापना गरेको छ । कार्यालयबाट चुनाव केन्द्रित गतिविधिहरु सञ्चालन गरिने पार्टीले जनाएको छ । रोड शोका क्रममा जसपा एवम् नेकपा एमालेका नेता कार्यकर्ताहरुको उल्लेखनीय संख्यामा उपस्थिती रहेको थियो ।