काठमाडौँ । कानुन विपरीत कान्तिपुरबाट निकालिएका पत्रकारहरुको न्यायका लागि धर्नामा बसेका पत्रकारमाथि आक्रमण प्रयास भएको छ । आन्दोलनको कार्यक्रम भइरहेका बेला एक अपरिचित युवाले आक्रमण प्रयास गरेका हुन् । नेपाल पत्रकार महासंघ एसोसिएट प्रदेश समितिको संयोजनमा कान्तिपुर मिडिया ग्रुपको गेट अगाडि आज धर्ना दिईरहेका बेला ती युवाले प्रहार गरेको ढुङ्गा पत्रकार टिकाराम प्रधानलाई लागेको थियो । पत्रकार प्रधान सामान्य घाइते भएका छन् । स्थानीय क्लिनिकमा उपचारपछि प्रधान धर्नामा सहभागी भए । आक्रमण गर्ने युवा को हुन भन्ने खुलेको छैन । उनलाई प्रहरीले नियन्त्रणमा लिएको छ ।

घाइते पत्रकार प्रधान कान्तिपुरबाट अन्यायमा परेका पत्रकार हुन् । लामो समयदेखी कान्तिपुरमा सेवारत पत्रकारहरुलाई श्रमजीवि  पत्रकार ऐन विपरित सेवाबाट निष्काशन गर्दै अधिकारबाट बन्चित गर्न खोजेपछि महासंघले त्यसको विरोध स्वरुप आन्दोलनको अगुवाई गर्दै आएको छ । कान्तिपुर मिडिया ग्रुपले कार्यरत पत्रकारहरुलाई  गैरकानुनी रुपमा निष्काशन गरेपस्चात नेपाल पत्रकार महासंघले आन्दोलनको कार्यक्रम राख्दै आएको छ । एशोसियट समिति अध्यक्ष बैकुण्ठ पराजुलीले नेतृत्व गरेको आजको धर्नामा महासंघका केन्द्रिय बरिष्ठ उपाध्यक्ष  रमेश बिष्ट, महासचिव रोशन पुरी, लेखा समिति संयोजक लेखनाथ न्यौपाने लगायतको सहभागीता रहेको थियो ।  

कार्यक्रममा महासंघका बरिष्ठ उपाध्यक्ष  रमेश बिष्टले पत्रकारहरुले न्याय नपाएसम्म आन्दोलन नरोकिने बताउदै कान्तिपुर व्यवस्थापनलाई सच्चिएर अघि बढन सुझाव दिए ।