भारतको उत्तरप्रदेशस्थित बलरामपुर जिल्लामा नेपाली यात्रु बोकेको बस दुर्घटनामा परेर ठोक्किएको घटना ठूलो त्रासदीमा परिणत भएको छ। ट्रकसँग ठोक्किएपछि बसमा आगलागी हुँदा तीन जनाको मृत्यु भएको पुष्टि भएको छ, भने २४ नेपाली यात्रु घाइते भएका छन्। त्यसमध्ये ६ जनाको अवस्था गम्भीर रहेको भारतीय प्रहरी स्रोतले जनाएको छ। मृतकहरूको पहिचान भने अझै खुल्न सकेको छैन।

मंगलबार बिहान करिब २:३० बजे यूपी २२ एटी ०२४५ नम्बरको बस र यूपी २१ डीटी ५२३७ नम्बरको ट्रक कोतवाली देहात थानाअन्तर्गत फुलबरिया सडकखण्डमा आपसमा ठोक्किएका थिए। ठक्करपछि बस करिब १ सय मिटरसम्म घिस्रिँदै गएर हाइटेन्सन लाइनको पोलमा ठोक्किएको थियो। पोल भाँचिएर बसमाथि खस्दा करेन्ट फैलिन गई आगो लागेको भारतीय सञ्चारमाध्यमले उल्लेख गरेका छन्।

बस नेपाल–भारत सिमाना नजिकको सुनौलीबाट नयाँदिल्लीतर्फ जाँदै थियो र यसमा करिब ४५ जना यात्रु सवार थिए। तीमध्ये धेरैजसो रुपन्देही क्षेत्र, विशेषगरी बुटवलका बासिन्दा रहेको दैनिक भाष्करको रिपोर्टमा उल्लेख छ। दुर्घटनास्थलमा उद्धार कार्यपछि घाइतेहरूलाई नजिकैका अस्पतालहरूमा उपचारका लागि लगिएको छ।