भक्तपुरको सल्लाघारीमा शनिबार दिउँसो नेकपा (एमाले) को ११ औं महाधिवेशन औपचारिक रूपमा उद्घाटन गरिएको छ। पार्टी अध्यक्ष एवं पूर्वप्रधानमन्त्री केपी शर्मा ओलीले रिमोटबाट झन्डोत्तोलन गर्दै महाधिवेशनको उद्घाटन गरेका हुन्। उद्घाटन समारोहलाई कडा सुरक्षा व्यवस्था र विविध सांस्कृतिक प्रस्तुतिले थप सजीव बनाएको थियो।

‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल सुखी नेपाली राष्ट्रिय गन्तव्य’ भन्ने मूल नारासहित सुरु भएको यो महाधिवेशन विधानअनुसार पाँच वर्षको अन्तरालमा हुनुपर्ने भए पनि यसपटक एक वर्ष अगाडि नै आयोजना गरिएको हो। यसअघि एमालेको १० औं महाधिवेशन मंसिर २०७८ मा चितवनमा सम्पन्न भएको थियो। नीति र विधि तय गर्ने विधान महाधिवेशन गत भदौमै सम्पन्न भइसकेकाले यो महाधिवेशन मुख्यतः नेतृत्व चयनमा केन्द्रित रहनेछ।

महाधिवेशनमा करिब २,२०० भन्दा बढी प्रतिनिधिहरू सहभागी छन्। तीमध्ये पार्टीबाट निर्वाचित तथा नामावलीमार्फत आएका प्रतिनिधिसँगै ३०९ जना पर्यवेक्षक पनि सहभागी छन्। प्रतिनिधित्वमा विभिन्न क्षेत्र, महिला, दलित तथा युवा समूहको उल्लेखनीय सहभागिता रहेको छ।

उद्घाटन समारोहमा विभिन्न राजनीतिक दलका नेताहरूको उपस्थिति रहेको थियो। नेपाली कांग्रेसका कार्यवाहक अध्यक्ष पुरनबहादुर खड्का, नेपाली कम्युनिस्ट पार्टीका नेता देव गुरुङ, राप्रपा अध्यक्ष राजेन्द्र लिङ्देन, नेपाल कम्युनिस्ट पार्टीका नेता नेत्र विक्रम चन्द ‘विप्लव’ लगायत अन्य दलका प्रतिनिधिहरूले शुभकामना मन्तव्य व्यक्त गरेका थिए।

तीन दिनसम्म चल्ने यो महाधिवेशन डिसेम्बर १३ देखि १५ (मंसिर २७–२९) सम्म सञ्चालन हुनेछ। महाधिवेशनमार्फत पार्टीका १५ पदाधिकारीसहित २५१ सदस्यीय केन्द्रीय समिति चयन गरिनेछ। एमालेले यसलाई आफ्नो इतिहासकै सबैभन्दा ठूलो भेला भएको दाबी गरेको छ र देशभरबाट कार्यकर्ता तथा प्रतिनिधिहरू काठमाडौंमा उपस्थित भएका छन्।

महाधिवेशन नेतृत्व चयनको दृष्टिले पनि महत्वपूर्ण मानिएको छ। अध्यक्ष पदका लागि वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलले उम्मेदवारी घोषणा गरिसकेका छन्। साथै, जेन–जी आन्दोलनपछि विकसित नयाँ सामाजिक–राजनीतिक परिस्थितिमा पार्टीको भावी रणनीति, नेतृत्व र दिशा तय गर्ने दृष्टिले पनि यो महाधिवेशनलाई अर्थपूर्ण रूपमा हेरिएको छ।