नेकपा एमालेको ११औँ महाधिवेशनअन्तर्गत नयाँ नेतृत्व चयनका लागि गरिएको मतदान प्रक्रिया साढे २१ घन्टापछि बिहीबार बिहान सम्पन्न भएको छ।

पार्टीको केन्द्रीय निर्वाचन आयोगका सचिव डा. कुन्साङ लामाका अनुसार बुधबार बिहान ९ बजेर २० मिनेटमा विद्युतीय मतदान मेसिनमार्फत सुरु भएको मतदान आज बिहान करिब ७ बजे टुंगिएको हो। उनका अनुसार अब मतगणनाको अन्तिम तयारी भइरहेको छ।

बिहीबार बिहान साढे ७ बजेतिर नेपालखबरसँग कुरा गर्दै उनले करिब आधा घन्टाभित्र मतगणना सुरु हुने र गणना सुरु भएको दुई घन्टाभित्र प्रारम्भिक नतिजा आउने अपेक्षा गरिएको जानकारी दिए।

एमाले महाधिवेशनमा कुल २ हजार २ सय ६३ मतदाता रहे पनि २ हजार २ सय २७ मत मात्र खसेको केन्द्रीय निर्वाचन आयोगले जनाएको छ। विभिन्न कारणले ३६ जना मतदाताले मतदान गर्न नपाएका हुन्।

नयाँ नेतृत्व चयनका लागि हालका अध्यक्ष केपी शर्मा ओली र वरिष्ठ उपाध्यक्ष ईश्वर पोखरेल आ–आफ्ना प्यानलसहित चुनावी प्रतिस्पर्धामा उत्रिएका छन्। यसबाहेक दुवै प्यानलमा नसमेटिएका केही उम्मेदवारले स्वतन्त्र रूपमा पनि उम्मेदवारी दिएका छन्।