सुदूरपश्चिम प्रदेशका पहाडी जिल्लाहरूमा शुक्रबार साँझदेखि हिमपातसहित हिउँदे वर्षा भइरहेको छ। बैतडी जिल्लाका उच्च लेकाली क्षेत्र खोड्पे, श्रीभावर, ढोल्यामोड, मुस्याचोर, सतबाँझ, देहिमाडौँलगायत स्थानमा हिमपात भएको जिल्ला प्रहरी कार्यालय बैतडीका प्रहरी निरीक्षक सुरज सिंहले जानकारी दिएका छन्।

हिमपात र वर्षा भए पनि मुख्य राजमार्गहरूमा हालसम्म कुनै अवरोध नदेखिएको प्रहरी निरीक्षक सिंहले बताएका छन्। यस्तै, दार्चुलाको व्यास र अपिहिमाल क्षेत्र तथा डडेल्धुरा सदरमुकामसँगै हगुल्टे, साहुखर्क र भातकाँडा क्षेत्रमा पनि हिमपात भएको प्रहरीले जनाएको छ।

यस वर्ष पहिलोपटक हिउँदे वर्षा र हिमपात भएपछि स्थानीय किसानहरू उत्साहित भएका छन्। विगत चार महिनादेखि पानी नपर्दा गहुँलगायत हिउँदे बाली सुक्न थालेका थिए। अहिले परेको हिमपात र वर्षाले बालीमा सुधार आउने अपेक्षासहित किसान खुसी देखिएका छन्।

यद्यपि, हिमपातका कारण चिसो अत्यधिक बढेकाले स्वास्थ्यमा असर पर्न सक्ने भन्दै स्वास्थ्यकर्मीहरूले आवश्यक सतर्कता अपनाउन आग्रह गरेका छन्।