News Desk
काठमाडौं । नेपाली कांग्रेसका सभापति गगन थापाले आगामी फागुन २१ गते हुने निर्वाचनमा कांग्रेसले कुनै पनि राजनीतिक दलसँग गठबन्धन नगर्ने स्पष्ट पुनः दोहोर्याएका छन् । पार्टीले आफ्नै संगठन, नीति र उम्मेदवारको बलमा चुनावी प्रतिस्पर्धा गर्ने उनले बताएका छन् ।
काठमाडौंमा आयोजित एक कार्यक्रमलाई सम्बोधन गर्दै सभापति थापाले कांग्रेस अब आत्मनिर्भर र जनआधारित राजनीतितर्फ अघि बढेको उल्लेख गरे । उनले विगतका चुनावी अनुभवबाट पाठ सिक्दै पार्टीले आफ्नै शक्ति परीक्षण गर्ने निर्णय लिएको बताए । “कांग्रेस आफ्नै एजेन्डा र आफ्नै उम्मेदवार लिएर जनतासामु जानेछ,” उनले भने, “जनताको विश्वास र मतकै आधारमा कांग्रेस विजयी हुनेछ भन्नेमा हामी विश्वस्त छौँ।”
थापाले गठबन्धनको राजनीतिले कहिलेकाहीँ कार्यकर्ता र मतदातामा अन्योल सिर्जना गर्ने भन्दै यसपटक स्पष्ट र पारदर्शी प्रतिस्पर्धा आवश्यक रहेको बताए । उनले पार्टीका सबै तहका नेता–कार्यकर्तालाई एकताबद्ध भएर संगठन सुदृढीकरण र घरदैलो अभियानमा लाग्न निर्देशनसमेत दिए ।
सभापति थापाका अनुसार कांग्रेसले चुनावी घोषणापत्रमार्फत लोकतन्त्रको सुदृढीकरण, सुशासन, रोजगारी सिर्जना, आर्थिक सुधार र सामाजिक न्यायलाई प्रमुख प्राथमिकतामा राख्नेछ । जनताको दैनिक जीवनसँग प्रत्यक्ष सरोकार राख्ने मुद्दालाई केन्द्रमा राखेर अभियान अघि बढाइने उनले बताए ।
उनले आगामी निर्वाचनलाई कांग्रेसको संगठनात्मक क्षमता र जनविश्वास मापन गर्ने महत्वपूर्ण अवसरका रूपमा व्याख्या गर्दै पार्टीभित्र कुनै भ्रम नफैलाउन पनि आग्रह गरे । कांग्रेस नेतृत्वले एकल प्रतिस्पर्धाको निर्णयले पार्टीलाई दीर्घकालीन रूपमा थप सशक्त बनाउने विश्वास व्यक्त गरेको छ ।