तनहुँ । प्रतिनिधिसभा निर्वाचन २०८२ मा तनहुँ निर्वाचन क्षेत्र नम्बर–२ बाट निर्वाचित सांसद इञ्जिनियर श्रीराम न्यौपाने यतिबेला आफ्नो निर्वाचन क्षेत्रका मतदातासँग भेटघाट कार्यक्रममा व्यस्त रहेका छन्। निर्वाचनमा अमूल्य मत प्रदान गरी आफूलाई विजयी गराएकोमा मतदाताप्रति आभार व्यक्त गर्दै उहाँले विभिन्न गाउँ–टोलमा पुगेर धन्यवाद ज्ञापन गरिरहनुभएको छ।

निर्वाचन क्षेत्रअन्तर्गतका विभिन्न स्थानमा आयोजित भेटघाट कार्यक्रममा सांसद न्यौपानेले जनताको विश्वासलाई सम्मान गर्दै आगामी दिनमा क्षेत्रको समग्र विकासका लागि सक्रियतापूर्वक काम गर्ने प्रतिबद्धता व्यक्त गर्नुभएको छ। उहाँले आफूलाई दिएको जनादेशलाई विकास, सुशासन र परिणाममुखी काममार्फत सार्थक बनाउने बताउनुभयो।

सांसद न्यौपानेको सचिवालयका अनुसार मतदाता भेटघाट तथा धन्यवाद कार्यक्रम आगामी केही समयसम्म निरन्तर सञ्चालन गरिनेछ। कार्यक्रममार्फत उहाँले स्थानीय नागरिकका समस्या, सुझाव तथा अपेक्षाहरू प्रत्यक्ष रूपमा सुन्दै समाधानका लागि पहल गर्ने योजना बनाएको जनाइएको छ।

इञ्जिनियर न्यौपाने ऊर्जा तथा जलस्रोत क्षेत्रका अनुभवी विज्ञका रूपमा परिचित हुनुहुन्छ। जलविद्युत् आयोजना, ऊर्जा नीति तथा पूर्वाधार विकासका क्षेत्रमा लामो समयदेखि काम गर्दै आउनुभएका उहाँसँग यस क्षेत्रमा समृद्ध अनुभव रहेको बताइन्छ। ऊर्जा विकास र विद्युत् व्यवस्थापनसम्बन्धी विभिन्न परियोजनामा उहाँको प्रत्यक्ष संलग्नता रहेको छ।

यसैबीच नयाँ सरकार गठनको तयारीसँगै इञ्जिनियर न्यौपानेलाई आगामी मन्त्रिमण्डलमा ऊर्जा मन्त्रालयको जिम्मेवारी दिइने सम्भावना रहेको चर्चा पनि राजनीतिक वृत्तमा भइरहेको छ। ऊर्जा क्षेत्रको गहिरो ज्ञान र व्यावसायिक अनुभवका कारण उहाँलाई सो जिम्मेवारीका लागि उपयुक्त व्यक्तिका रूपमा हेरिएको बताइन्छ।

मतदाता भेटघाटका क्रममा सांसद न्यौपानेले नेपाललाई ऊर्जा क्षेत्रमा आत्मनिर्भर बनाउने, जलविद्युत् उत्पादन विस्तार गर्ने तथा विद्युत् निर्यातलाई व्यवस्थित रूपमा अगाडि बढाउने आफ्नो प्राथमिकता रहने उल्लेख गर्नुभयो। साथै उहाँले ग्रामीण क्षेत्रमा विद्युत् पहुँच विस्तार, ऊर्जा पूर्वाधार सुदृढीकरण तथा स्थानीय विकासका कार्यक्रमलाई तीव्रता दिने प्रतिबद्धता व्यक्त गर्नुभएको छ।

“जनताले दिएको विश्वास र समर्थन मेरो लागि ठूलो जिम्मेवारी हो। यो जनादेशलाई विकास र समृद्धिको काममार्फत प्रमाणित गर्ने प्रयास गर्नेछु,” उहाँले भन्नुभयो।