काठमाडौँ | मनाङ, मुस्ताङ लगायतका उच्च हिमाली क्षेत्रमा भारी हिमपात भएको छ भने विभिन्न पहाडी जिल्लामा मध्यम वर्षा भइरहेको छ। यसका कारण दैनिक जनजीवन प्रभावित बनेको छ।

मनाङको वारागुङ मुक्तिक्षेत्रअन्तर्गत मुक्तिनाथ क्षेत्रमा आज अपराह्नदेखि भारी हिमपात सुरु भएको छ। पछिल्लो समय मुस्ताङमा कात्तिक १० गतेयता यो छैटौँपटक हिमपात भएको हो। मुक्तिनाथ विकास समितिका व्यवस्थापक दिनेश भुसालका अनुसार हिमपात निरन्तर भइरहँदा मन्दिर आसपासका डाँडाकाँडा पूर्ण रूपमा हिउँले ढाकिएका छन्।

मुक्तिनाथ मन्दिरमा बिहान बढी दर्शनार्थी आउने भएकाले आजको हिमपातले उनीहरूलाई खासै असर नपरेको जनाइएको छ। तर, अत्यधिक चिसोका कारण स्थानीय बासिन्दाको दैनिकी प्रभावित भएको छ।

मुक्तिक्षेत्रका विभिन्न स्थान—मुक्तिनाथ, रानीपौवा, झारकोट, खिङ्गा, छेङ्गुर, पुडाक र झोङमा पनि बाक्लो हिमपात जारी रहेको जनप्रिय युवा क्लबका अध्यक्ष कैसाङ ठोक्या ठकुरीले जानकारी दिएका छन्। उनका अनुसार रातभर हिमपात जारी रहे दुई फिटसम्म हिउँ जम्न सक्ने र सडक अवरुद्ध हुने सम्भावना रहेको छ।

यस्तै, माथिल्लो मुस्ताङका लोमान्थाङ र लोघेकर दामोदरकुण्ड गाउँपालिकामा पनि हिमपात भइरहेको छ। एक्याप लोमान्थाङका प्रमुख उमेश पौडेलका अनुसार हिमपात नरोकिने हो भने समग्र माथिल्लो मुस्ताङ क्षेत्र हिउँले ढाकिने सम्भावना छ। चिसो बढेसँगै स्थानीय जीवनमा प्रतिकूल प्रभाव परेको उनले बताए।

त्यसैगरी, मुस्ताङका तल्लो क्षेत्र थासाङ र घरपझोङ गाउँपालिकाका उच्च भूभागमा आंशिक हिमपात भइरहेको छ भने बस्ती क्षेत्रमा दिउँसोदेखि निरन्तर वर्षा जारी रहेको छ।